Qyzylordada Roza Baǵlanova atyndaǵy respýblıkalyq án baıqaýy ótti
QYZYLORDA. QazAqparat - Qyzylordada Halyq qaharmany Roza Baǵlanova atyndaǵy respýblıkalyq «Aqmańdaılym» ánshiler baıqaýy ótti, dep habarlaıdy QazAqparat tilshisi.
Bul baıqaý ústimizdegi jyly tórtinshi márte ótkizilip otyr. Baıqaýda Almaty, Astana, Shymkent, Kókshetaý, Semeı qalalary men Batys Qazaqstan, Atyraý, Aqtóbe, Túrkistan, Jambyl, Qostanaı, Qyzylorda oblystarynan kelgen barlyǵy 20 úmitker baqtaryn synady.
Konkýrsta Qazaqstannyń eńbek sińirgen qaıratkeri, kompozıtor Keńes Dúısekeev, Qazaqstannyń eńbek sińirgen qaıratkerleri Erjan Abdrahmanov, Sembek Jumaǵalıev, R. Baǵlanovanyń kelini Maral Baǵlanova, jergilikti ánshi Kúlánda Qalymbetovalar tórelik etti.
«Syr óńiri ótkizgen árbir baıqaýda naǵyz talanttardy tanýǵa tyrysady. Osylaısha naǵyz talanttarǵa jol ashylady», - dedi belgili kompozıtor Keńes Dúısekeev.
Ádilqazylar alqasynyń sheshimimen bas báıge Astana qalasynan kelgen Aıdyn Jumabaevqa buıyryp, oǵan Baǵlanovtar otbasy taǵaıyndaǵan 500 myń teńgeniń sertıfıkaty men Halyq qaharmanynyń beınesindegi statýetka tabys etildi. Birinshi orynǵa qyzylordalyq Raqymjan Maqsatbaev ıe bolsa, ekinshi orynǵa aqtóbelik Nurtas Omarov pen Batys Qazaqstannan kelgen Erqat Jaqashev laıyq dep tanyldy. Úzdik úshtikti Qyzylorda oblysynyń Aral aýdanynan kelgen Sabyrjan Kólbaev pen Túrkistan oblysynyń «Saryn» trıosy túıindedi.
Ereje boıynsha konkýrsta ánshiler eki án oryndady. Alǵashqy týrda ánshi R.Baǵlanovanyń repertýaryndaǵy ánderden bir týyndyny kópshilik nazaryna usynsa, kelesi týrda Qazaqstan kompozıtorlarynyń qazirgi tańdaǵy zamanaýı jazylǵan bir shyǵarma tyńdarmanǵa jol tartty.
Konkýrstyń gala-kontserti búgin ánshiniń týǵan jeri Qazaly aýdanynda ótedi.
