Qyzylordada robot tehnıkasynan oblystyq irikteý chempıonaty ótti
Atalmysh shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynyń eki jyldyǵyna oraı qolǵa alyndy. Іrikteý chempıonaty «Bolashaq» ýnıversıtetinde oblystyq bilim basqarmasy jáne oblystyq «Rýhanı jańǵyrý» ortalyǵynyń qoldaýymen uıymdastyryldy.
Atalmysh chempıonatqa qatysýshylar sany jyldan jylǵa artyp keledi. Byltyr atalmysh saıysqa 60-qa jýyq oqýshy qatysqan edi. Bıyl olardyń sany 350 órenge jetti. Jas qyzylordalyqtardyń ıntellektýaldy bilimin jetildirýge belsendi qyzyǵýshylyǵynyń sebebi bar. Búginde aımaqtaǵy mektepter janynan robot tehnıkasy synyptary men ınnovatsııalyq úıirmeleri ashyldy. Sondaı-aq, balalarǵa arnalǵan tehnoparqter jelisi qalyptasyp keledi.
Nátıjesinde mektep oqýshylary halyqaralyq jáne respýblıkalyq deńgeıde ótkiziletin saıystarǵa jıi qatysyp júr. Olardyń arasynda jyldan-jylǵa zor tabystarǵa qol sozǵan balalar qatary kóbeıýde.
Bıyl atalmysh saıysqa Qyzylorda qalasynan ǵana emes oblystyń barlyq aýdanynan mektep oqýshylary qatysty. Saıysqa túsken oqýshylar tańqalarlyq ıdeıalar usyndy. Máselen, 6 synyp oqýshysy Amangeldi Ádilet propannyń ıisin anyqtaıtyn qurylǵy oılap tapqan. Úıińizden nemese basqa jerden gaz qubyrynan ketken aqaýdy ıis arqyly sezip, uıaly telefonyńyzǵa qońyraý shalady. Eń bastysy - munyń bári qarapaıym telefonǵa jalǵanǵan robotpen basqarylady.
Shıeli aýdany Tartoǵaı aýyldyq Sh. Esenov atyndaǵy orta mektep oqýshysy Muhtar Ernar «Naýbaıhana óndirisi» jobasyn usyndy. Munda birneshe avtomattandyrylǵan mashına bıdaıdy oryp, kólikke tıep untaqtaıdy. Daıyn bolǵan ónim balama energııadan qýat alǵan peshterge jóneltiledi. ıAǵnı, birneshe adam isteıtin jumysty qarapaıym robot jasaıdy.
Qalalyq IT aımaq orda resýrstyq ortalyǵynyń oqýshysy Raýshanbek Beıbarys 3D prıntermen quıyp jasalǵan jerdiń qunarlyǵyn zertteıtin qurylǵy jasaǵan. Adam aıaǵy barmaıtyn jerlerge arnalǵan qurylǵy jerdiń temperatýrasyn, ylǵaldylyǵyn ýltradybystar arqyly zertteıdi. Qazaly aýdanynan kelgen «Erýdıt» komandasy jip ıiretin urshyqty avtomattandyrylǵan mashınaǵa aınaldyrǵan. Oǵan qosa «Aqyldy qoqys jáshigin» oılap tapqan. Innovatsııalyq salaǵa qyzyǵýshylyǵy basym mektep oqýshylarynyń daıyndaǵan qurylǵylary kóptiń kóńilinen shyqty.
«QR Tuńǵysh Prezıdenti - Elbasy Nursultan Nazarbaev ómirsheń baǵdarlamalyq maqalasynda jańǵyrýdyń 6 baǵytyn belgiliep berdi. Sonyń biri - bilimniń saltanat qurýy. Zamanaýı ınnovatsııalyq tehnologııalardy esepke ala otyryp, bilim sapasyn arttyrý qajettiligi basty maqsattyń biri. Qazirdiń ózinde tehnologııalyq jáne ekonomıkalyq jańalyqtar qalypty ómir daǵdysyn ózgertip jatyr. Bul aldaǵy ýaqytta tutastaı salalar naryqtaǵy qajettiligin joǵaltyp, keıbir mamandyqtar múldem joıylyp ketedi. Sol úshin de jańa daǵdylar men iskerlikti ıgerýge, jańa talaptarǵa beıimdelýge shákirtterimizdiń qabilettiligin arttyrý - negizgi maqsat», - dedi oblystyq «Rýhanı jańǵyrý» ortalyǵynyń basshysy Nurlybek Myńjas.