Qyzylordada «Robofest» atty robottehnıka festıvali ótti

Oǵan  6-17 jas aralyǵynda  100-ge jýyq úmitker qatysty. Іs-sharany oblystyq bilim basqarmasy «QazRobotıks» federatsııasynyń qoldaýymen uıymdastyryp otyr. Jas tehnıkter: syzyq boıymen  jarys, kegelrıng-kvadro, robosýmo jáne robofýtbol sekildi 4 kategorııa boıynsha saıysqa tústi. Robosýmo kategorııasynan birinshi oryndy qazalylyq oqýshy Serik Kemal  ıelendi. Kegelrıng-kvadro jarysynan qyzylordalyq Jandáýlet Baqytbek pen Asylhan Saılybaev  jeńis tórinen kórinse, syzyq boıymen jarystan Maǵjan Іskendir men Oralbek Abdýllaev jeńimpaz atandy. Jeńimpazdar dıplom jáne baǵaly syılyqtarmen (sandyq quraldar men orgtehnıkamen) marapattaldy. Sondaı-aq, festıval aıasynda qatysýshy muǵalimderge arnalǵan sheberlik synyptar ótkiziledi.

Oblys ákiminiń orynbasary Rýslan Rústemov festıvalge qatysýshylardy marapattap, aımaqta IT-salasy men tsıfrlandyrý boıynsha barlyq qajetti sharalar qabyldanyp jatqanyn aıtty.

«Salanyń mańyzdylyǵyn eskere otyryp, biz 2017 jyldan bastap oblystaǵy 9 oqýshylar úıinde robottehnıka úıirmelerin ashyp, «3D zerthanalarymen» jabdyqtaýdy qolǵa aldyq. Sondaı-aq, 25 ınnovatsııalyq mektepte robottehnıka elektıvti kýrs retinde eńgizildi. Elbasynyń bıylǵy halyqqa Joldaýynda qoǵamnyń barlyq salalaryn tsıfrlandyrý, zamanaýı tehnologııalardy engizý jaıynda keńinen aıtylǵany belgili. Biz jańa HHІ ǵasyrdyń munaıy - bilim, aqparat, sandy tehnologııalar ekenin jaqsy túsinýge mindettimiz», - dedi R.Rústemov.

Aıta keteıik, qazirgi tańda oblystaǵy 9 qosymsha bilim berý uıymdarynda 316 jas óren robottehnıka úıirmesine qatysyp, tálim alýda. Esterińizge sala keteıik, ótken jyly jeltoqsan aıynda HackDay 2017 alǵashqy aımaqtyq festıvali uıymdastyryldy, oǵan 137 komanda qatysty. Qatysýshylardyń ıedıalary, tipti, Almatydan, Astanadan kelgen ınvestorlar qyzyǵýshylyq tanytýda.

Syrdarııanyń sol jaǵalaýynda zamanaýı jastar resýrstyq ortalyǵy men ІT-park salynýda. Onda jas programmısterge 20 jumys orny ashylady.

 

Ádiljan Úmbet