Qyzylordada respýblıkalyq jyrshy-jyraýlar baıqaýy ótkiziledi
Atalǵan shara el Táýelsizdiginiń 30 jyldyǵy merekesine oraı uıymdastyrylady. Osyǵan oraı oblystaǵy mádenıet uıymdary men óner mekemelerinde túrli mádenı sharalar qolǵa alynyp otyr.
«Táýelsizdiktiń 30 jyldyǵyna bizde oblystyq is-sharalar jospary bekitilgen. Jyl basynan beri barlyq mádenıet uıymdarynda jáne óner mekemelerindeosy merekege baılanysty aýqymdy sharalar ótkizilýde. Onyń ishinde «Tuǵyry bıik Táýelsizdik» atty respýblıkalyq aqyndar aıtysyn atap ótsek bolady. Osy sıpattaǵy sharalarymyz barlyq mádenıet uıymdarynda jalǵasyn tabýda»,- dedi oblystyq mádenıet arhıvter jáne qujattama basqarmasy basshysynyń mindetin atqarýshy Nurshat Naýryzbaeva.
El Táýelsizdiginiń mereıtoıy qarsańynda Kete Júsip Eshnııazulynyń 150 jyldyǵyn atap ótý de josparlanǵan.
Sondaı-aq, oblystyq fılarmonııa tarapynan da osy maqsatta kóptegen mádenı sharalar ótkiziledi.
«Atalǵan is-sharalar qatarynda Turmaǵambet atyndaǵy halyq aspaptar orkestriniń jyl kontsertin atap ótsek bolady. Oǵan qosa, «Qorqyt sazy» qobyzshylar ansambliniń «Saryn» atty sazdy keshi jáne qazaqtyń ańyz jáne salt ertegileriniń 30 keıipkeri tsıklymen «Ádemi» balalar mýzykalyq teatr-stýdııasynyń qysqametrajdy qoıylymy kórermen qatysýymen ótkiziledi. Qalǵan týyndylar pandemııa jaǵdaıyna baılanysty onlaın formatta uıymdastyrylady», - dedi oblystyq fılarmonııanyń dırektory Talǵat Maqashev.
Eske salsaq, budan buryn Qyzylorda oblysynda ardagerler uıymynyń konferentsııasy ótti.