Qyzylordada respýblıkalyq «Kóktem nury» oqýshylar aıtysy ótkizildi
Óner báıgesinde elimizdiń 5 óńiri, Qyzylorda qalasy jáne Syrdarııa, Shıeli aýdandarynan 10 aıtysqer baq synady.
Respýblıkalyq oqýshylar aıtysyn oblys ákimi Gúlshara Ábdiqalyqova ashyp, sóz dodasyna túsken jas aqyndarǵa qoldaý bildirdi.
«Oıly sózdi aıta bilgen aıtys aqyndaryn halyq qashanda qurmet tutqan. Oblysta aıtys dástúrli túrde úzdiksiz ótip keledi.
Syr óńiri óziniń áridegi Nartaı, Manap, keshegi Mahanbetqalı, Zamaddın, beridegi Serik, Elena, Ábilqaıyr, búgingi Muhtar, Nurmat, Meıirbek sekildi aıtys aqyndarymen maqtanady. Sonyń ishinde aıtystyń aqtańgeri Muhtar Nııazovtyń úsh márte «Altyn dombyra» ıegeri atanýy - ulttyq ónerimizdiń Syr elindegi mártebesiniń kórsetkishi sekildi. Urpaqtar sabaqtastyǵynyń belgisindeı respýblıkamyzdyń túkpir-túkpirinen daryndy, oıy zerek, temirqanat jas túlek aqyndarymyz Syr óńirine jınaldy», - dedi Gúlshara Ábdiqalyqova.
Sóz dodasyna belgili aıtysker aqyn, memlekettik «Daryn» syılyǵynyń ıegeri Bekarys Shoıbekov, úsh dúrkin «Altyn dombyra» ıegeri Muhtar Nııazov jáne belgili jyrshy-termeshi Amandyq Búrlibaev tórelik etti.
Baıqaý qorytyndysymen halyq aqyny Manap Kókenov atyndaǵy bas júlde men aqshalaı syılyq qyzylordalyq Meıirjan Qartbaıǵa tabystaldy.
Al birinshi oryn mańǵystaýlyq Ersultan Aýshanovqa, ekinshi oryn shıelilik Ámirhan Eldarǵa buıyrdy. Sondaı-aq, Taraz qalasynyń týmasy Alıhan ıAshar men aqtóbelik Nuradın Araı úshinshi oryndy ózara bólisti.
