Qyzylordada prokýrorlar mektepterde smartfon ustaýǵa tyıym salýdy usyndy
ASTANA. QazAqparat - Qyzylorda oblysynyń prokýratýrasy «Bilim berý mekemelerindegi quqyqbuzýshylyqtardyń aldyn alý» jobasyn jasaqtady. Bul týraly vedomstvonyń baspasóz qyzmeti habarlady.
«Birinshi kezekte ol bilim berý oryndarynda krımınogendik ahýaldy jaqsartýǵa, mektepterdi beınebaqylaý kameralarymen jáne mektep ınspektorlarymen 100 paıyz qamtamasyz etýge, tárbıe jumysynyń tıimdiligin arttyrýǵa, sonyń ishinde oqýshylar men oqytýshylarǵa smartfon qoldanýǵa tyıym salýǵa baǵyttalǵan», - delingen habarlamada.
Mysaly, smartfondarǵa tyıym salý máselesinde, mektep erejelerinde olardy qoldanýǵa shekteý engizý qarastyrylǵan. Mektepterde tek «qońyraý shalý/jaýap berý/SMS» fýnktsııalary bar telefon ustaýǵa ruqsat etý kózdelýde.
«Sebebi smartfondardy qoldaný bilim berý protsesine keri áserin tıgizedi jáne eń qorqynyshtysy - smartfondar balalardyń rýhanı jáne adamgershilik turǵyda damýyna keri áserin tıgizetin ınternetke shekteýsiz qoljetimdilik beredi», - delingen habarlamada.
Oblys prokýrory Halıdolla Dáýeshovtiń sózi boıynsha, prokýratýra qyzmetkerleri «VKontakte» jelisin tekserý barysynda ózine-ózi qol jumsaýdy úgitteıtin paraqshalarǵa 106 jetkinshek tirkelgenin anyqtaǵan. Mobıldi baılanystyń keri áserimen qatar, mektep qabyrǵasynda qymbat telefondardyń urlyǵy da órship tur. Negizinen, mektepterde oryn alatyn qylmystardyń 65 paıyzy uıaly telefondarǵa qatysty.
«Sondaı-aq smartfondardy qoldanýǵa salynatyn tyıym muǵalimderge de qatysty bolady, sebebi oqý saǵattary kezinde olardyń kóńili negizgi jumystarynan bólinedi», - dep jazady Qyzylorda prokýratýrasy.
