Qyzylordada polıtsııanyń kómegimen bankomattar ınkassatsııalanyp jatyr
Qyzylorda oblysynyń Polıtsııa departamenti halyqtyń qaýipsizdigi men tynyshtyǵyn qamtamasyz etý baǵytynda barlyq qajetti jedel sharalardy qabyldaýda. Óńirde 5-19 qańtar aralyǵynda tótenshe jaǵdaı rejımi jarııalanǵan. Soǵan baılanysty negizgi sharalar men shekteýler bekitildi. Oblysta 23.00-den 7.00-ge deıin komendanttyq saǵat engizildi.
Atalǵan ýaqytta Іshki ister organdaryna 391 adam jetkizildi, Olardyń árqaısynyń is-áreketine quqyqtyq baǵa beriledi. Qoǵamdyq qaýipsizdikti saqtaý maqsatynda qala kóleminde 5 blok beket qoıyldy. Al 7 aýdanda 23 blok beket ornalasqan. Onda táýlik boıy polıtsııa qyzmetkerleriniń narıadtary, áskerı qyzmetshiler kezekshilik etedi. Arnaıy tehnıkamen qamtamasyz etilgen.
«Aımaqta jedel ahýal turaqty. Ákimshilik ǵımarattar, narıad, blok posttar qarýly kúzetpen qamtamasyz etildi. Kóshedegi jaǵdaı baqylaýda. Memlekettik, bank, basqa da uıymdar jumysy qalpyna keldi. Tótenshe jaǵdaıǵa túsinistikpen qarap, qoldaý kórsetken azamattarǵa alǵysymdy aıtamyn. Turǵyndardan qaýipsizdik sharalaryn saqtap, quqyq qorǵaý organdary qyzmetkerleriniń zańdy talaptaryn oryndaýlaryńyzdy suraımyz», - dedi Qyzylorda oblysynyń komendanty polıtsııa polkovnıgi Bektóre Sultan.
Eske salsaq, Qyzylordada tártipsizdik kezinde tótenshe jaǵdaılar salasynyń ǵımarattary zaqymdalǵan joq.
