Qyzylordada polıtsııadan qashqan kólik júrgizýshisi jazaǵa tartyldy
QYZYLORDA. QazAqparat - Qyzylordada jol erejesin buzǵan «Lada Largus» avtokóliginiń júrgizýshisi tártip saqshylarynan qashyp ketýge árekettengen. Polıtsııanyń zańdy talabyna baǵynbaǵan ol kóshede toqtamastan úıiniń ashyq turǵan qaqpasyna kirip ketken, dep habarlaıdy QazAqparat tilshisi.
Bul oqıǵa Qyzylorda qalasyndaǵy Toraıǵyrov kóshesiniń boıynda ornalasqan. Patrýldeý kezinde polıtseılerge jedel basqarý ortalyǵynyń operatorynan qaýipsizdik beldigin taqpaı, jol qozǵalysy erejelerin buzǵan «Lada Largus» markaly kóligine baǵdar berildi. Polıtseıler dybys kúsheıtkish quraly arqyly oǵan toqtaý jóninde eskertý bergen. Oǵan qulaq aspaǵan quqyq buzýshy jol qaýipsizdigi erejelerin buza otyryp, ortalyq kóshemen jolyn jalǵastyra berdi. Polıtseılerdiń zańdy talabyna baǵynbaı, jolyn jalǵastyrǵan júrgizýshi úıiniń ashyq turǵan qaqpasy arqyly kirip ketken.
«Mán-jaıdy anyqtaý úshin 35 jastaǵy kólik júrgizýshi Qyzylorda qalalyq polıtsııa basqarmasyna jetkizildi. Onda oǵan qatysty QR Ákimshilik quqyq buzýshylyq týraly kodeksiniń 593-babynyń 2-bóligi, 595-baptyń 1-bóligi, 602-baptyń 1-1 bóligi, 613-baptyń 1-bóligi boıynsha ákimshilik hattamalar toltyryldy. Onda qaýipsizdik beldigin paıdalaný jónindegi talaptardy saqtamaý, manevr jasaý qaǵıdalaryn buzý, syrtqy jaryq túsirý aspaptaryn paıdalaný qaǵıdalaryn buzý, ishki ister organdary qyzmetkerleriniń talaptaryn oryndamaý jaǵdaılary kórsetilgen», - dep málim etti Qyzylorda oblystyq polıtsııa departamentiniń baspasóz qyzmeti.
Budan buryn Qyzylordada 254 keli balyqty zańsyz aýlaǵan turǵyn ustalǵanyn jazǵanbyz.
