Qyzylordada polıtsııa qyzmetkerlerine dene jaraqatyn salǵan 4 jigit qolǵa tústi
QYZYLORDA. QazAqparat - Qyzylordada polıtsııa qyzmetkerlerine dene jaraqatyn salǵan 4 turǵyn qolǵa tústi, dep habarlaıdy QazAqparat tilshisi.
Atalmysh oqıǵa búgin 3 tamyzda túngi saǵat 03.30 shamasynda bolǵan. Sol sátte polıtsııanyń kezekshi bólimine oblys ortalyǵyndaǵy dámhanalardyń birinde jas jigitterdiń tóbeles shyǵaryp jatqany jaıynda habarlama tústi.
Oqıǵa ornyna jetken polıtsııa qyzmetkerleriniń zańdy talabyna buzaqylyq tanytqan belgisiz azamattar baǵyna qoıǵan joq. Tipti qarsylyq kórsetip, dene jaraqatyn salǵan.
«Quqyq buzýshylardyń áreketterine tosqaýyl qoıý maqsatynda polıtsııa qyzmetkerleri tabeldi qarý qoldanýǵa májbúr boldy. Olarǵa eskertý retinde aspanǵa bir ret oq atqan. Jedel sharalar barysynda oqıǵa ornynda jas shamasy 25-30 aralyǵyndaǵy 4 adam ustaldy. Atalǵan derek boıynsha Qyzylorda qalalyq Polıtsııa basqarmasy QR Qylmystyq Kodeksiniń 293-babynyń 1-bóligi jáne 380-babymen sotqa deıingi tergep-tekserý áreketterin bastady. Onda buzaqylyq jáne bılik ókiline qatysty kúsh qoldaný jaǵdaılary kórsetilgen. Polıtsııa qyzmetkerleri tabeldik qarý qoldaný deregine quqyqtyq baǵa berý úshin departament tarapynan qyzmettik tergeý júrgizilýde», - dep málim etti Qyzylorda oblystyq polıtsııa departamentiniń baspasóz qyzmeti.
Qazirgi ýaqytta ustalǵandardyń bireýi Qyzylorda qalalyq polıtsııa basqarmasynynyń ýaqytsha ustaý abaqtysyna qamaldy. Qalǵanyna qatysty bultartpaý sharasyn qoldaný máselesi qaralýda.
Budan buryn Qyzylordada alaıaqtyq qylmysy órship turǵanyn habarlaǵan edik.
