Qyzylordada polıtsııa qyzmetkerin urǵan 3 jigit sottaldy
QYZYLORDA. QazAqparat - Qyzylordada polıtsııa qyzmetkerine qol jumsaǵan úsh jigit bas bostandyǵynan aıryldy, dep habarlaıdy QazAqparat tilshisi.
Atalmysh oqıǵa 2018 jyldyń qyrkúıek aıynda bolǵan. Bir-birin burynnan tanıtyn 29 jastaǵy úsh jigit Qyzylorda qalasyndaǵy kafelerdiń birinde syra ishedi. Syraǵa ábden qyzyp alǵan úsheýi úılerine qaıtý úshin sol mańda turǵan taksı júrgizýshisine keledi. Odan úılerine tegin jetkizip salýdy surap, dórekilik tanytady.
Bul ýaqytta ýchaskelik polıtsııa qyzmetkeri sol mańda júrgen edi. Tártip saqshysy dórekilik kórsetken úsheýdiń sabyrǵa kelip, eshqandaı artyq áreket jasamaýyn suraıdy. Polıtsııa qyzmetkeriniń bul talabyna baǵynbaǵan álgi úsheý oǵan qoqan-loqy kórsetip, balaǵattaıdy. Tipti, tártip saqshysyna qol jumsaıdy. Soqqydan qulaı qoımaǵan ýchaskelik polıtsııa qyzmetkerin taǵy bireýi qylǵyndyrady. Osylaısha úsheýi polıtsııany jerge qulatady. Oǵan qol jumsaýyn jalǵastyrady. Polıtsııa qyzmetkeri áriptesterine tártipsizdiktiń oryn alǵanyn habarlap úlgeredi.
«Atalmysh qylmystyq oqıǵa Qyzylorda qalalyq №2 sotynda qaraldy. Bul qylmystyq is boıynsha sot úkimi shyqty. Jábirlenýshiniń betinen tepken jigit jeti aıǵa bas bostandyǵynan aıryldy. Qalǵan ekeýine alty aıǵa bas bostandyǵyn aırylý jazasy taǵaıyndaldy. Olar óz kinálaryn moıyndady. Ekeýiniń buryn sottylyǵy bolǵan», - dedi Qyzylorda qalalyq №2 sotynyń tóraǵasy Aıbek Ábý.
