Qyzylordada polıtsııa qyzmetkerin pyshaqtap ketti

QYZYLORDA. QazAqparat - Qyzylorda qalasynda polıtsııa qyzmetkerin pyshaqtap ketti. Bul jóninde áleýmettik jelide jazyldy, dep habarlaıdy QazAqparat tilshisi.

Derekti oblystyq Polıtsııa departamenti rastady. Oqıǵa qalanyń Tıtov móltek aýdanynda bolǵan.

«Atalǵan derek boıynsha QR Qylmystyq kodeksiniń 380-1-baby 2-bóliginiń 6-tarmaǵymen qylmystyq is tirkeldi. Onda adamdar tobynyń aldyn ala sóz baılasý arqyly quqyq qorǵaý organy qyzmetkeriniń ómirine qolsuǵýshylyq jaǵdaıy kórsetilgen. Buǵan baılanysty jan-jaqty jáne obektıvti tergep-tekserý jumystary júrgizilýde. Qylmystyq-protsestik kodekstiń 201-babynyń talabyna sáıkes, tergeýdiń ózge derekteri jarııa etýge jatpaıdy», - dep málim etti vedomstvodan.

Eske salsaq, 30 shildede súıgen qyzyn qarata almaǵan Qyzylorda turǵyny ózin jaǵyp jibergeni týraly jazǵan bolatynbyz. Qazir ol aýrýhanada, jaǵdaıy aýyr.