Qyzylordada polıtseıler toqtatqan kólikten 5 myltyq pen pyshaq shyqty
QYZYLORDA. QazAqparat - Qyzylorda oblysy Іshki ister departamenti Jergilikti polıtsııa qyzmetiniń Jol-patrýldik polıtsııa rotasynyń qyzmetkerleri jol qozǵalysyn erejesin buzýmen qatar zańsyz ań aýlaýmen aınalysqan azamatty ustady, dep habarlady QazAqparat HAA tilshisi oblystyq ІІD silteme jasap.
Oqıǵa aqpan aıynyń segizi kúni túngi saǵat 00.05 shamasynda Qyzylorda-Jalaǵash tas jolynyń 91-shaqyrymynda Mádenıet kópiri tusynda oryn alǵan. Polıtsııa qyzmetkerleri artqy jaryq shamdary janbaǵan kúıi kele jatqan «Ýaz-2206» markaly avtokóligin baıqap, toqtatady. Avtokólikti basqaryp kele jatqan 1964 jyly týylǵan azamattyń qujattaryn tekserý barysynda júrgizý kýáliginiń merzimi ótip ketkendigin anyqtaıdy. Sonymen qatar, avtokóliktiń júksalǵyshynan 5 myltyq, 1 pyshaq jáne qara tústi paketke salynǵan toraıdyń eti tabyldy.
Júrgizýshige qatysty Qazaqstan Respýblıkasynyń Ákimshilik quqyq buzýshylyq týraly kodeksiniń 593-babynyń 1-bóligi (Marshrýttyq kólik quraldaryn toqtatý, turǵyn aımaqtarda júrý, jolaýshylardy jáne júkterdi tasymaldaý qaǵıdalaryn saqtamaý jáne jol júrisiniń qaǵıdalaryn basqa da óreskel buzýy) jáne 612-baby (Qujattary joq jáne basqarý quqyǵy joq adamnyń kólik quralyn basqarýy) negizinde ákimshilik hattamalar toltyrylyp, Qazaqstan Respýblıkasy Qylmystyq kodeksiniń 337-baby 1-bóligimen qylmystyq is qozǵaldy. Tıisti tekserý jumystary júrgizilýde.
