Qyzylordada polıtseıler páter urlyǵymen aınalysqan 34 jastaǵy azamatshany qolǵa túsirdi
QYZYLORDA. QazAqparat - Qyzylordada bóten múlik urlyǵyna qatysy bar degen kúdikpen esh júrde jumys istemeıtin 1982 jyly týylǵan oblys turǵyny ustaldy, dep habarlady QazAqparat HAA tilshisi oblystyq ІІD silteme jasap.
Birinshi urlyq qylmysy ótken jyly 30 qyrkúıekte tirkelgen. Ol kezde sezikti jábirlenýshiniń uıaly telefonyn qoldy etip, oqıǵa ornynan qashyp ketken bolatyn.
Al ekinshi derek 2017 jyldyń 3 qańtarynda oryn alǵan. «Jaına» saýda ortalyǵynda túski saǵat 14.00 shamasynda qala turǵynynyń syrtqy kıimin urlap ketip, 17 myń teńge kóleminde shyǵyn keltirgen.
Sonymen qatar, atalǵan azamatshanyń qatysýymen 12 qańtar jáne 15 qańtar kúnderi 2 páter urlyǵy qylmysy oryn alǵan. Birinshi jaǵdaıda, Qyzylorda qalasynyń turǵyny óziniń páterine belgisiz bireýler kirip, noýtbýgyn jáne qysqy kıimderin urlap ketkendigin kórsetken bolatyn. Oqıǵa ornyna polıtsııa qyzmetkerleri baryp, páter urlyǵy esik kiltterin irikteý arqyly kirý nátıjesinde oryn alǵandyǵyn anyqtady. Jábirlenýshige keltirilgen shyǵyn kólemi 657 000 teńgeni quraǵan.
Al ekinshi jaǵdaıda úı-jaıdan noýtbýk, 2 dana «Samsung» markaly uıaly telefon jáne qysqy kıimder qoldy bolyp, shyǵynnyń jalpy somasy 200 000 teńgeni quraǵan.
Jedel-izdestirý sharalary barysynda 34 jastaǵy azamatsha ustalyp, oǵan qatysty Qazaqstan Respýblıkasy Qylmystyq kodeksiniń 188-baby 2- bóligi negizinde qylmystyq is qozǵaldy. Qazirgi tańda jan-jaqty tergep-tekserý jumystary júrgizilip, ustalǵan azamatshanyń basqa da qylmystarǵa qatystylyǵy anyqtalýda.
