Qyzylordada polıtseıler asa iri kólemdegi sıntetıkalyq esirtkiniń jolyn kesti
Qyzylorda oblystyq Polıtsııa departamenti Esirtki qylmysyna qarsy is-qımyl basqarmasyna jedel habarlama kelip tústi. Atalǵan maqsatta jedel-izdestirý is-sharalary júrgizildi. Nátıjesinde oblys ortalyǵynda atyraýlyq 23 jastaǵy turǵyn ustaldy. Odan jalpy salmaǵy 116 gramnan asatyn mefedron sıntetıkalyq esirtki zaty tárkilendi. Bul – Qyzylordada aınalymnan alǵash alynǵan qaýipti esirtki preparattarynyń biri.
«Atyraýlyq jigit qala ortalyǵynan páter jaldaǵan. Oǵan tintý júrgizý barysynda páterdi sıntetıkalyq esirtki daıyndaıtyn kishigirim zerthanaǵa aınaldyrǵany belgili boldy. Páter ishinen satýǵa daıyndalǵan 91 danaǵa bólektengen aq tústi untaqtar tárkilendi. Sol jerden daıyndaýǵa arnalǵan tarazy, rýlon folga, túrli-tústi ızolenta, skotchtar, túrli-tústi boıaǵyshtar, dámdeýishter zattaı dálel retinde alyndy. Saraptama qorytyndysy boıynsha tárkilengen untaqtyń mefedron sıntetıkalyq esirtkige jatatyny naqtylandy», - dep málim etti Qyzylorda oblystyq polıtsııa departamentinen.
Vedomstvo málimetinshe, kúdikti ınternet jelisi arqyly tapsyrys qabyldap, sıntetıkalyq esirtki zattaryn qala ortalyǵyndaǵy ártúrli oryndarǵa jasyrǵan. Ol polıtsııa sıntetıkalyq esirtkin jasyrǵan jerlerin kórsetti. Bul oryndardan jalpy salmaǵy 81 gramnan asatyn 50 dana esirtki zaty tárkilendi. Kúdikti Qyzylorda qalalyq Polıtsııa basqarmasynyń Ýaqytsha ustaý ızolıatoryna qamaqqa alyndy. Onyń ústinen QR Qylmystyq kodeksiniń 297-baby 3-bóliginiń 3-tarmaǵyna sáıkes sotqa deıingi tergep-tekserý amaldary jalǵasýda.
Eske salsaq, budan buryn Qyzylordada dızel otynyn zańsyz satqan kásipkerge sot úkimi shyqty.
