Qyzylordada polıtseıdi jaraqattaǵan buzaqy ustaldy
QYZYLORDA. 28 mamyr. QazAqparat - Qyzylorda qalasynda ózin tártipke shaqyrǵan polıtsııa qyzmetkerine qol kótergen buzaqy qolǵa tústi.
Bul týraly oblystyq ishki ister departamentiniń baspasóz qyzmeti habarlady
«25 mamyrda oblystyq ishki ister departamenti jedel basqarý ortalyǵynan qalalyq ishki ister basqarmasy Aqsaı polıtsııa bólimine qala ortalyǵyndaǵy mektep mańynda bir top balanyń tóbelesip jatqany týraly dabyl tústi. Artynsha oqıǵa basyna jetken polıtsııa toby álgilerdi ustaıdy. Odan soń Aqsaı PB-niń tergeý toby jetken kezde, ústinde qara kostıým kıgen belgisiz azamat avtokólik ishinde polıtsııa qyzmetkerleriniń zańdy talabyna baǵynbaǵan. Polıtseıdi basymen qatty soǵyp, dene jaraqatyn salǵan», - delingen habarlamada.
Tekserý barysynda polıtsııa qyzmetkerine kúsh kórsetken buzaqynyń Qyzylorda qalasynyń 1996 jyly týǵan M.R. degen turǵyny ekeni anyqtaldy. Qazirgi tańda tekserý amaldary júrgizilýde.
Eger kúdiktiniń qylmysy tolyq dáleldense, 200 aılyqtan 500 aılyq eseptik kórsetkishke deıingi mólsherde aıyppul salýǵa nemese 5 jylǵa deıingi merzimge bas bostandyǵynan aıyrýǵa jazalanýy múmkin.
