Qyzylordada polıtseıdi balaǵattaǵan turǵynǵa qylmystyq is qozǵaldy
Atalǵan azamat Qyzylorda qalalyq polıtsııa basqarmasynyń ǵımaratynda dórekilik kórsetken. Polıtsııa qyzmetkeriniń eskertýin elemegen. Oǵan til tıgizip, balaǵat sóz aıtqan.
«Búgingi tańda atalǵan derek boıynsha QR Qylmystyq kodeksiniń 378-baby boıynsha (Bılik ókilin qorlaý) sotqa deıingi tergep – tekserý amaldary júrgizilip jatyr. Kúdiktige qatysty eshqaıda ketpeý týraly qolhat túrindegi bultartpaý sharasy qoldanyldy. Eger kúdiktiniń kinási dáleldense, bir júz alpys aılyq eseptik kórsetkishke deıingi mólsherde aıyppul salynady nemese túzeý jumystaryna, júz alpys saǵatqa deıingi merzimge qoǵamdyq jumystarǵa tartylady. Qyryq táýlikke deıingi merzimge qamaýǵa alý jazasy da taǵaıyndalýy múmkin», - dedi Qyzylorda oblysy Polıtsııa departamenti bastyǵynyń birinshi orynbasary Shamshıdın Amıtov.
Tótenshe jaǵdaı rejımi jarııalanǵannan bastap oblys boıynsha tótenshe jaǵdaı rejımin buzǵan 527 derek anyqtaldy. Olardyń 149-y kólikterdiń qozǵalysyna tyıym salý, 84-i esh sebepsiz turǵyn úıden tys jerde júrý, 67-i dúkender boıynsha, 49-y dámhana-meıramhanalardyń qaýly talaptaryn oryndamaýy boıynsha oryn alǵan. Olardyń birqataryna aıyppul salynyp, keıbiri ákimshilik qamaqqa alyndy. Taǵy 13 adamǵa eskertý jasaldy.
Búgingi tańda Qyzylorda oblysynda koronavırýs ınfektsııasy qoıylǵan 127 adam bar.