Qyzylordada páterdegi órtten es-tússiz jatqan áıel qutqaryldy

QYZYLORDA. QazAqparat - Qyzylorda qalasynda kóp qabatty úıdiń tórtinshi qabatyndaǵy páterden órt shyǵyp, qutqarýshylar jalyn ortasynan es-tússiz jatqan áıeldi alyp shyqty, dep habarlaıdy QazAqparat tilshisi.

Oqıǵa búgin, 30 shildede saǵat 11.53 shamasynda bolǵan. Sol ýaqytta 112 qutqarý qyzmetine Abaı dańǵyly 62 úıdiń tórtinshi qabatyndaǵy páterden órt shyǵyp jatqany jóninde habarlama kelip túsken.

«Oqıǵa ornyna №2 mamandandyrylǵan órt sóndirý bólimi jumyldyrylyp, barlaý jumystaryn júrgizdi. Mamandar páter ishinde turmystyq zattardyń janyp jatqanyn anyqtady. Páterde es-tússiz jatqan 1976 jylǵy azamatshanyń bar ekeni belgili boldy. Ony Órt sóndirý jedel kezekshisiniń orynbasary, azamattyq qorǵaý aǵa leıtenanty Oljas Ahmetov pen №2 MÓSB aǵa ınjeneri, azamattyq qorǵaý aǵa leıtenanty Mádı Tórálıev qaýipsiz jerge alyp shyqty. Oǵan alǵashqy medıtsınalyq kómek kórsetildi. Sodan keıin jedel járdem qyzmetine tapsyryldy. Azamatsha qazir qalalyq aýrýhanada em qabyldaýda», - dep málim etti Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.

Vedomstvo málimetinshe, órt saǵat 12.09-da oqshaýlandyrylyp, saǵat 12.12-de tolyq sóndirilgen. Órt shyǵyny men shyǵyn mólsheri anyqtalýda.

Eske salsaq, búgin Shıeli aýdanynda aýa raıy qolaısyzdyǵynan mektepterdiń shatyry ushyp ketti.