Qyzylordada páter urlyǵyn kásip etken qylmystyq top quryqtaldy
QYZYLORDA. QazAqparat - Qyzylorda oblysynda páter urlyǵynyń 11 qylmys deregin jasaǵan 3 adamnan turatyn qylmystyq top músheleri qolǵa tústi, dep habarlaıdy QazAqparat tilshisi.
Qazirgi tańda Qyzylorda oblysynda páter urlyǵynyń oryn alýy alańdatyp otyr. Bıylǵy jylǵy 1 qańtar-26 aqpan aralyǵynda Qyzylorda oblysynda 155 páter urlyǵy tirkelgen. Onyń ishinde oblys ortalyǵy - Qyzylorda qalasynda barlyǵy 103 páter urlyǵy oryn alǵan.
«Páter urlyǵynyń oryn alýyna sebepshi jaǵdaılar bar. Kóp jaǵdaıda úı-jaılar qaraýsyz qalyp jatady. Turǵyndar óz úılerine temir esik jáne terezege temir tor ornata bermeıdi. Oǵan qosa, aýla qorshaýy jáne beınekameranyń joqtyǵy da páter urlyǵynyń kóbeıýine áserin tıgizedi», - dedi Qyzylorda oblystyq polıtsııa departamenti bastyǵynyń orynbasary Baıjan Baıgeldi.
Osy maqsatta páter urlyǵynyń aldyn alý, boldyrmaý jáne ony ashý maqsatynda 17 qańtardan bastap polıtsııa qyzmetkerleri oblys ortalyǵynda «Páter» jedel profılaktıkalyq is-sharasyn ótkizdi. Oǵan Qyzylorda qalalyq polıtsııa basqarmasynyń krımınaldy polıtsııa jáne jergilikti polıtsııa qyzmetkerleri jumyldyryldy. Tártip saqshylary qylmys deregi kóp oryn alatyn «Saıahat», «Sáýlet», «Rısmash» shaǵynaýdandarynda jumys jasady. Al 16-25 aqpan kúnderi KBI, «Jappasbaı batyr» shaǵynaýdandary men Qyzyljarma aýyldyq okrýginde «Kvadrat» jedel profılaktıkalyq is-sharasy uıymdastyryldy.
«Іs-sharaǵa Qyzylorda qalalyq polıtsııa basqarmasynan 60 qyzmetker jumyldyryldy. Bólingen jeke quram atalǵan ákimshilik aımaqtarda ishki ister organdarynyń profılaktıkalyq jáne tizimdik esebinde turǵan tulǵalardy jáne qarý ıelerin tekserdi. Ýchaskelik polıtsııa qyzmetkerleri jadynamalar taratty. Turǵyndarmen pikir almasý arqyly páter urlyǵynyń aldyn alý maqsatynda túsindirý sharalary júrgizildi. Jedel profılaktıkalyq is-sharalar barysynda 15 qylmys dereginiń kúdikti tulǵasy quryqtaldy. Qazirgi ýaqytta sotqa deıingi tergep-tekserý amaldary júrgizilýde», - dedi B.Baıgeldi.
Búgingi tańda oblysta páter urlyǵy ǵana emes, basqa da urlyq qylmystarynyń aldyn alý, boldyrmaý jáne ashý maqsatynda kúsheıtilgen jumystar júrgizilip jatyr.
Budan buryn Qyzylordada saqshylar kópqabatty úıde tereze aldynda otyrǵan balany qutqarǵanyn habarlaǵan edik.
