Qyzylordada páter ishinde esinen tanyp qulap qalǵan qarııa qutqaryldy

QYZYLORDA. QazAqparat - Qyzylordalyq qutqarýshylar páterinde esinen tanyp qulap qalǵan toqsan jastaǵy azamatshany ajaldan qutqaryp qaldy, dep habarlaıdy QazAqparat tilshisi.

Tótenshe jaǵdaılar salasy mamandaryna qala turǵynynan habarlama kelip tústi. Onda «Mereı» shaǵyn aýdanyndaǵy páterdiń birinde 90 jastaǵy anasynyń esikti ashpaı jatqanyn aıtqan.

«Oqıǵa ornyna jedel-qutqarý jasaǵynyń qutqarýshylary keldi. Qarııa tórtinshi qabatta turady eken. Qutqarýshylar besinshi qabattan tereze arqyly úı ishine kirýge májbúr boldy. Páter ishinde 1929 jyly dúnıege kelgen qarııanyń qulap jatqanyn kórdi. Qarııa turýǵa múmkindigi bolmaı, kire beris esik aldyna qulap túsken. Oqıǵa ornyna jedel járdem qyzmetkerleri shaqyrtylyp, qart kisi dárigerlerge tapsyryldy», - dep málim etti Qyzylorda oblystyq tótenshe jaǵdaılar departamenti baspasóz qyzmetiniń mamany Aıgúl Nurmanova QazAqparat tilshisine.

Esterińizge sala ketelik, budan buryn Qyzylordada qonaq úıden órt shyqqanyn habarlaǵan edik.