Qyzylordada para alǵan sheneýnikter sottaldy
Qyzylorda qalalyq №2 sotynda Belkól kentiniń burynǵy ákimi men onyń ekonomısine qatysty qylmystyq is qaraldy. Eks-sheneýnikter bıznes ashyp, kásibin dóńgeletýdi maqsat etken azamattan qomaqty kólemde qarajat alǵandary anyqtaldy.
Ústimizdegi jyldyń 4 sáýirinde jeke kásipker Belkól kenti ákimdiginen jer telimin surap barǵan. Mundaǵylar, máseleni ońtaıly sheshý úshin qala ákimdigi janyndaǵy jer komıssııasy múshelerine 500 myń teńge berý kerek ekenin jetkizgen. Sheneýnikterdiń sózine ılanǵan turǵyn kelisilgen qarajattyń aldymen 200 myń teńgesin, araǵa birneshe kúnnen keıin taǵy 200 myń teńge bergen. Kent ákimdiginiń ekonomısine qalǵan 100 myń teńgeni keıinirek jetkizip beretin aıtqan. Sol sátte jaýapty maman qosymsha taǵy da 150 myń teńge suraǵan eken. Paraqor sheneýnikterdi Sybaılas jemqorlyqqa qarsy is-qımyl ulttyq bıýrosynyń (Sybaılas jemqorlyqqa qarsy qyzmet) Qyzylorda oblysy boıynsha departamentiniń qyzmetkerleri ustady.
«Kásipker parany Belkól kenti ákimdiginiń ekonomısine bergen. Qarajattyń basym kópshiligin jeke maqsatyna jumsaǵan da sol azamat ekendigi tergeý kezinde dáleldendi. Sot úkimi boıynsha ol eki jarym jylǵa shartty túrde bas bostandyǵynan aıyrylyp, 10 mıllıon teńge aıyppul salyndy. Al, aýyl ákimine 10 mıllıon 500 myń teńge aıyppul salyndy. Eki azamat ta ómir boıyna laýazymdy qyzmetterdi atqarý quqyǵynan aıyryldy», - dep málim etti Qyzylorda oblysytyq sotynyń baspasóz qyzmeti.
Shıeli aýdany Gıgant aýylynyń ákimi de jazaǵa tartyldy. Bul sheneýnik jer qujattaryn rásimdep berý úshin kásipkerden 50 myń teńge para alǵan. Munan soń qyzmettik bólmesinde «Óńirlerdi damytýdyń 2020 jylǵa deıingi baǵdarlamasy» aıasynda Gıgant aýyldyq okrýginiń aımaǵynan jer ýchaskesiniń qujattaryn rásimdep, jer telimin jalǵa berýge sheshim shyǵaryp berý úshin taǵy bir adamnan 60 myń teńge alý ústinde qolǵa tústi. «Sottalýshy sot protsesi kezinde óz kinásin tolyqtaı moıyndady. Sot úkimimen ol ómir boıyna laýazymdyq qyzmetterdi atqarý quqyǵynan aıyrylyp, 7 mıllıon 700 myń teńge kóleminde aıyppul tóleýge mindetteldi», - dedi Qyzylorda oblystyq sotynyń baspasóz qyzmeti.