Qyzylordada para alǵan polıtseı qolǵa tústi
Qyzylorda oblysy polıtsııa departamenti ózindik qaýipsizdik basqarmasy qyzmetkerler arasynda jemqorlyqty boldyrmaý jáne zańdylyqty saqtaý baǵytynda keshendi jumystar júrgizdi. Atalǵan shara barysynda departamenttiń Ekstremızmge qarsy is-qımyl basqarmasynyń jedel ýákili para alǵany úshin ustaldy.
«Búgingi tańda oǵan qatysty QR Qylmystyq kodeksiniń 366-babynyń 2-bóligi boıynsha (para alý) sotqa deıingi tergep-tekserý amaldary júrgizilýde. Onyń barysynda kúdiktiniń jasaǵan is-áreketine sáıkes zańda belgilengen tártippen tıisti quqyqtyq baǵa beriledi. Tergeý múddesinde ózge aqparattar jarııalanýǵa jatpaıdy. Polıtsııada pogondaryna kir keltirmeıtin, adal jáne jumysyna asa jaýapkershilikpen qaraıtyn qyzmetkerler jumys isteýi tıis», - dep atap ótti Qyzylorda oblysy polıtsııa departamentiniń bastyǵy, polıtsııa polkovnıgi Bektóre Sultan.
Budan buryn Qyzylordada esirtki saýdasymen aınalysqan ýchaskelik polıtseı qolǵa túsken edi.