Qyzylordada oıynshyq tapanshamen dúken tonaǵan adam qolǵa tústi
Bul oqıǵa 9 qyrkúıekte saǵat 19.00 shamasynda tirkeldi. Sol ýaqytta Qyzylorda qalalyq polıtsııa basqarmasynyń kezekshi bólimine oblys ortalyǵynyń 42 jastaǵy turǵynynan habarlama tústi. Oblys ortalyǵyndaǵy dúkenniń birinde satýshy bolyp jumys isteıtin ol ózin belgisiz jas jigittiń tapanshaǵa uqsas zatpen qorqytyp, dúkennen araq-sharap pen sýsyn alyp ketkenin habarlaǵan.
Sálden keıin soǵan uqsas taǵy bir habarlama kelip tústi. Onda belgisiz azamattyń kassadaǵy barlyq aqshany berýin talap etedi. Degenmen satýshy áıel oǵan qarsy áreket etedi. Kassany kiltpen jaýyp, dúkende beınebaqylaý bar ekenin aıtady. Dúkende kúıeýi júrgenin jetkizedi. Sol ýaqytta kúdikti dereý qashyp ketedi.
Jábirlenýshilerden tonaýshynyń bet álpetiniń sıpattamasyn alǵan tártip saqshylary barlyq polıtsııa ekıpajyna baǵyt-baǵdar berdi. Polıtseıler tarapynan júrgizilgen jedel-izdestirý jumystarynyń nátıjesinde kúdikti qolǵa tústi. Ol buryn sottalǵan azamat bolyp shyqty.
«Odan aıǵaqty zattar tárkilendi. Olardyń ishinde oıynshyq tapansha da bar. Tekserý barysynda kúdikti azamattyń eki tonaý deregine qatysy bar ekeni anyqtaldy. Kúdiktige qatysty QR Qylmystyq kodeksiniń 191-baby 2-bóliginiń 1-tarmaǵymen sotqa deıingi tergep-tekserý bastaldy. Onda jábirlenýshiniń ómirine nemese densaýlyǵyna qaýipti emes kúsh qoldaný qaterin tóndirip jasaǵan tonaý jaǵdaıy kórsetilgen», - dep málim etti Qyzylorda oblystyq polıtsııa departamentiniń baspasóz qyzmeti.
Qazirgi tańda kúdikti ýaqytsha ustaý abaqtysyna qamaqqa alyndy.
Mondaı-aq, Qyzylorda oblysy Jańaqorǵan aýdanynda qum arasynan 2 esirtki alqaby tabyldy.