Qyzylordada ótken respýblıkalyq qoǵamdyq keńeste bes áleýmettik bastamanyń iske asyrylýy talqylandy

QYZYLORDA. QazAqparat - «Prezıdenttiń bes áleýmettik bastamasyn» baqylaý jónindegi respýblıkalyq qoǵamdyq keńestiń tóraǵasy Baqytjan Jumaǵulov bastaǵan delegatsııa Qyzylorda oblysyna júr.  Іssapar barysynda keńes tóraǵasy   aımaqtaǵy áleýmettik jáne ónerkásiptik obektilerdiń jumysymen tanysyp, «Prezıdenttiń bes áleýmettik bastamasy» boıynsha kezdesýge qatysty, dep habarlaıdy oblys ákiminiń resmı saıty.

Baqytjan Jumaǵulov Syrdarııa ózeniniń sol jaǵalaýyndaǵy «7-20-25» baǵdarlamasyn iske asyrý aıasyndaǵy turǵyn úı qurylysy jumystarymen tanysty.

Eske sala keteıik, aǵymdaǵy jyly Qyzylorda oblysynda «Orda»  turǵyn úımen qamtamasyz etýge arnalǵan jol kartasy sheńberinde halyqtyń áleýmettik osal toptaryn qoljetimdi baspanamen qamtý josparlanýda.

Kezektegi adamdarǵa Syrdarııanyń sol jaǵalaýynan satyp alýǵa qoljetimdi 14 kópqabatty úıdiń qurylysy bastaldy.

 Atap óteıik, oblysta turǵyn úı kezeginde 27 myń adam, sonyń ishinde Qyzylorda qalasynyń 23 myń turǵyny bar.

Sondaı-aq, qoǵamdyq keńestiń tóraǵasy 2017 jyldyń qarashasynda bastalǵan «Qaraózek» joǵary tehnologııalyq gazdy sorǵy stansasynyń qurylysy barysymen jáne osy jyldyń sáýir aıynda «Shaǵyn nesıe berýdi kóbeıtý» tórtinshi bastamasy aıasynda ashylǵan «Q-med» klınıkasynyń jumysymen tanysty.

Sonymen qatar, Baqytjan Jumaǵulov úsh aılyq kýrstarda 3 jáne 4 sanatty gaz dánekerleýshileri bilim alatyn «Elektrotehnologııa» JShS oqý ortalyǵy men «Bolashaq» ýnıversıtetinde de  boldy. 

Dostyq úıinde oblys ákimi Qyrymbek Kósherbaevtyń, respýblıkalyq qoǵamdyq keńestiń tóraǵasy Baqytjan Jumaǵulovtyń, «Nur Otan» partııasynyń hatshysy Farhad Qýanǵanovtyń, tıisti memlekettik organdar ókilderiniń, saıası partııa jáne qoǵam belsendileriniń qatysýymen Memleket basshysynyń bes áleýmettik bastamasyn Qyzylorda oblysynda júzege asyrý boıynsha keńes bolyp ótti. 

Oblys ákimi Qyrymbek Kósherbaev Memleket basshysy tapsyrmasynyń aımaqta iske asý barysy týraly baıandama jasady. Shaǵyn jáne orta kásipkerlikti qoldaý men mıkrokredıtter sanynyń ulǵaıýy arqyly  aǵymdaǵy jyldyń 6 aıynyń ishinde ózin-ózi tıimsiz jumyspen qamtyǵan jáne jumyssyz 97538 adamnyń 27 myńnan astamy jumysqa ornalastyryldy.

«2018 jyldyń basynda oblysta ózin-ózi tıimsiz jumyspen qamtyǵan jáne jumyssyz 97538 adam anyqtaldy. 2018 jyldyń 6 aıynda 7000-nan astam adamdy jańa jumys oryndaryna ornalastyryp, 20400-den asa jumyssyzdy ónimdi jumyspen qamtyp, 20 myń azamattyń qyzmetin zańdastyryp, onyń 17 myńǵa jýyǵy jumys berýshilermen eńbek kelisimshartyn jasady. 3000-ǵa jýyǵy memlekettik kiris organdaryna jeke kásipker retinde tirkelip, zańdy túrde kásipterin bastady»,- dedi oblys ákimi.

Oblystyq bilim basqarmasy basshysynyń orynbasary Aqzıra Qasymova óńirdegi joǵary bilimniń qoljetimdiligi men sapasyn jaqsartý jáne stýdenttik jataqhanalar jaǵdaıyn jaqsartý boıynsha júrgizilip jatqan jumystar týraly baıandady.

Máselen, Syrdarııanyń sol jaǵalaýynda memlekettik-jekeshelik áriptestik sheńberinde «Bolashaq» ýnıversıtetiniń qazirgi stýdenttik kampýsynyń qurylysy júrgizilýde.

5 áleýmettik bastamany iske asyrý týraly ortalyq atqarýshy organdardyń basshylary josparlanǵan is-sharalar sheńberindegi jańa múmkindikter týraly baıandady.

Kezdesýdi qorytyndylaı kele, áleýmettik bastamalardy iske asyrý jónindegi keńestiń tóraǵasy Baqytjan Jumaǵulov óńirde atqarylǵan jumystardy joǵary baǵalady.

Tústen keıin delegatsııa músheleri 10 fermany biriktirgen«Shıeli-tórt túligi» aýyl sharýashylyq kooperatıvi men táýligine 400 lıtr shubatqa deıin óńdeıtin «Arý Ana» tsehyn da aralap kórdi.