Qyzylordada órtengen úıdiń balkonynan sekirgen turǵyn kóz jumdy

QYZYLORDA. QazAqparat - Qyzylorda qalasynda kóp qabatty úıde órt shyǵyp, úshinshi qabattaǵy páter turǵyny balkonnan sekirip ketip, mert boldy, dep habarlaıdy QazAqparat tilshisi.

Qyzylorda oblystyq jumyldyrý daıyndyǵy basqarmasynyń habarlaýynsha, oqys oqıǵa búgin, 31 qazanda saǵat 16.05 shamasynda Qyzylorda qalasyndaǵy «Shuǵyla» móltek aýdanyndaǵy №40 úıde bolǵan.

Órt saldarynan páterdegi turmystyq zattar órtengen. Jalyn 20 sharshy metrdi sharpydy. Órt sóndirý qyzmeti tarapynan saǵat 16:29-da páter ishindegi órt oqshaýlanyp, saǵat 16:31-de tolyq sóndirildi. Otty abaısyz paıdalaný saldarynan órt shyqqan.

«Kýágerlerdiń aıtýy boıynsha, 3-qabattaǵy úı ıesi 46 jastaǵy er adam órtten qorǵaný úshin terezeden sekirip, alǵan jaraqatynan oqıǵa ornynda qaıtys boldy. Atalǵan derek sotqa deıingi tergep - tekserýdiń biryńǵaı júıesine tirkelip, tergep-tekserý jumystary júrgizilýde», - dep málim etti Qyzylorda oblystyq polıtsııa departamentiniń baspasóz qyzmetindegiler.