Qyzylordada Ortalyq Azııanyń 5 memleketiniń qatysýymen Aral máselesine arnalǵan halyqaralyq forým ótedi
QYZYLORDA. QazAqparat-Mamyrdyń 30-31 kúnderi Araldyń turaqty damýyna arnalǵan halyqaralyq forým ótedi. Bul týraly oblys ákiminiń orynbasary Serik Qojanııazov pen Araldy qutqarý halyqaralyq qorynyń Qazaqstandaǵy atqarýshy dırektory Bolat Qabykenulynyń qatysýymen ótken baspasóz máslıhatynda málim boldy.
Bul týraly QazAqparat tilshisi habarlady.
Forýmǵa Ortalyq Azııanyń 5 memleketi men basqa da halyqaralyq uıym ókilderi qatysady. Maqsat - Aral máselesine qoǵam nazaryn aýdarý, aımaqtyń əleýmettik-ekonomıkalyq damýyn ilgeriletetin jobalardy naqtylap, óńirdiń ekologııalyq ahýalyn jaqsartý joldaryn talqylaý.
Forýmnyń birinshi kúni baıandamalar tyńdalsa, ekinshi kúni delegattar Araldy tikushaqpen baǵdarlap, teńiz tynysymen tanysady. Basqosý aıasynda birneshe jobalardyń tanystyrylymy ótedi. Atap aıtqanda, Qambash kólinde ǵylymı-týrıstik ortalyq ashý, sondaı-aq, Araldyń shyǵys bóligindegi teńiz ultanyna aǵash otyrǵyzyp, jasyl beldeý jasaý jəne úshinshi joba - kıik taralymyn kóbeıtýge arnalǵan pıtomnıkti iske qosý jobalary kópshilik nazaryna usynylady.
