Qyzylordada órt 10 adamnyń ómirin qıyp ketti
QYZYLORDA. QazAqparat - Qyzylorda oblysynda órt oqıǵasy saldarynan jyl basynan beri 10 adam qaza tapty, dep habarlaıdy QazAqparat tilshisi.
Oblystyq tótenshe jaǵdaılar departamentiniń derekterine qaraǵanda, ústimizdegi jyly 407 órt oqıǵasy bolǵan. Saldarynan 10 adam kóz jumsa, taǵy 8-i ártúrli deńgeıdegi jaraqat alǵan. Sondaı-aq, kómir qyshqyl gazyna ýlaný jaǵdaıy da kezdesti. Atap aıtqanda, kómirqyshqyl gazyna ýlanýdyń 4 deregi tirkelse, ekeýinde tabıǵı gazǵa ýlaný tirkelgen.
«12 adamǵa medıtsınalyq kómek kórsetildi. Onyń ishinde 7-eýi bala. Osy keleńsiz jaǵdaılar azamattardyń turmysta órt qaýipsizdigi erejesi talaptaryn saqtamaǵandyǵynan bolyp otyr», - dedi oblystyq tótenshe jaǵdaılar departamentiniń baspasóz mamany Aıgúl Nurmanova.
Qazirgi tańda oblysta qysqy mezgilde «Órt qaýipsizdigi aılyǵy» turaqty túrde júrgiziledi.
