Qyzylordada óristegi maldy atyp alyp ketken qylmystyq top qolǵa tústi
QYZYLORDA. QazAqparat - Qyzylorda oblysy Jalaǵash aýdanynda jaıylymda júrgen maldy atyp alyp ketken qylmystyq top qolǵa tústi, dep habarlaıdy QazAqparat tilshisi.
Qylmystyq top 2018 jyldyń sońǵy aılarynan bastap jaıylym men qoralardan mal urlap kelgen. Olar jaıylymda júrgen maldy atyp alatyn bolǵan. Sondaı-aq, soıylǵan maldy oblys ortalyǵyndaǵy jeke kásipkerlerge arzan baǵamen etke ótkizip otyrǵan.
«Atalmysh qylmystyq toptyń ústinen jábirlenýshi 4 azamattan aryz kelip tústi. Turǵyndar 3 jylqy, 2 sıyr urlanǵanyn aıtyp shaǵymdanǵan. Jergilikti turǵyndarǵa 1,5 mln teńge shamasynda shyǵyn kelgen. Jedel izdestirý sharalary barysynda Jalaǵash aýdanynda turatyn 6 jigit qolǵa tústi. Kúdiktilerdiń jasy 22-31 aralyǵynda. Top músheleri qylmystaryn tolyq moıyndady», - delingen Qyzylorda oblystyq polıtsııa departamentiniń baspasóz qyzmeti taratqan habarlamada. 
Olardyń turǵyn úılerine júrgizilgen tintý barysynda zańsyz saqtalǵan 12 jáne 16 kalıbrli uńǵyly myltyqtary jáne etti tasyǵan avtokólik tárkilendi. Endi olar mal urlyǵy qylmysynan bólek zańsyz qarý saqtaǵany úshin de jaýapkershilikke tartylady.
Qyzylorda oblysynda «Mal urysy» is-sharasy barysynda polıtsııa 13 mal urlyǵyn ashty.
Eske sala ketsek, budan buryn Qyzylordada 5 mln teńge urlaǵan turǵyn sottalǵanyn habarlaǵan edik. 
