Qyzylordada Óner arbaty ashyldy
QYZYLORDA. QazAqparat. Búgin, 1 mamyr - Qazaqstan halyqtarynyń birligi merekesi kúni Qyzylorda qalasynda jergilikti qolónershiler, sýretshiler men sheberlerdiń óz týyndylaryn nasıhattaýyna múmkindik týǵyzatyn Óner arbaty ashyldy, dep habarlaıdy QazAqparat tilshisi.
Óner arbaty jobasy oblys ákimdiginiń qoldaýymen oblystyq mádenıet jáne arhıvter jáne qujattama basqarmasynyń uıymdastyrýymen qolǵa alynyp otyr. Igilikti is Qyzylorda qalasynyń 200 jyldyǵyna oraılastyrylyp otyr. Ashyq aspan astyndaǵy mádenı oryn halyqtyń jergilikti sheberleri ázirlegen túrli dúnıelerimen etene tanysýyna jol ashatyn bolady. Óner arbaty jyl boıyna halyqqa qyzmet kórsetedi.
«Óner arbaty kásibı jáne áýesqoı sýretshiler, qolóner sheberleri shyǵarmashylyqpen aınalysýyna qolaıly jaǵdaı jasaıdy. Týyndylaryn jarnamalaýǵa múmkindik beredi. Aıta keterligi, bul oryn halyqtyń rýhanı demalatyn qoǵamdyq-mádenı mekenine aınalady degen senim zor. Oǵan qosa óner adamdary sheberlik dárisin ótkize alady. Sonymen qatar, qala qonaqtaryn Syr óńiriniń óneri men mádenıetimen tanystyratyn arnaıy oryn bolady. Qysqasy, bul jer sýretshiler, qolónershiler jáne sheberlerdiń shabyt alatyn ornyna aınalady», deıdi oblystyq mádenıet, muraǵat jáne qujattama basqarmasynyń basshysy Mıra Ábýova.
Óner arbatynyń ashylý saltanatyna kelgen qyzylordalyqtar men qala qonaqtary qolóner sheberleri men sýretshilerdiń qııalynan týǵan san alýan dúnıelermen jan-jaqty tanysty. Sondaı-aq, munda úrmeli aspaptar jáne vokaldy aspaptar orkestrleriniń ónerpazdary halyqqa ónerin kórsetse, jas aqyndar men ónerpazdar, skrıpkashylar da óz týyndylaryn tartý etti. Shara barysynda ártúrli ulttyq oıyndar, aǵa býyn men jastar arasynda túrli saıystar ótkizildi. Kishkentaı órender «Besik terbetken ana» beınesindegi kishi arhıtektýralyq belginiń mańyna gúl otyrǵyzdy.
«Syr óńiri - qashanda ónerge baı. Mundaı qanshama qolóner sheberleri aımaqtyń abyroıyn asqaq etip keledi. Elimizde ótken halyqaralyq sharalarda da olar joǵary baǵasyn alyp júr. Atap aıtqanda, bizde temirden túıin túıgen ustalar, aǵashtan ǵajap dúnıeler jasaıtyn sheberler, qylqalammen san alýan týyndyny salatyn sýretshiler jáne ózge de qolónershi azamattar az emes. Men shı toqý isimen aınalysyp kelemin. Alǵashqyda sýret salýmen aınalyssam, endi atalmysh iske kóńil bólip júrgenime 16-17 jyldyń júzi boldy. Qyzylorda qalasynda Óner arbatynyń ashylyp jatqanyna qýanyshtymyn. Buryn mundaı oryndardy Reseıdiń Máskeý jáne Sankt-Peterbýrg, elimizdiń Astana jáne Almaty qalalarynda bar ekenin biletin edik. Oblys basshylyǵynyń qoldaýymen tusaýyn kesip jatqan bul orynnyń jergilikti jurtqa bereri kóp», deıdi Shıeli aýdanynan kelgen qolóner sheberi Zylıqa Qalender.
1 mamyr - Qazaqstan halqy birligi merekesine oraı Qyzylorda qalasynda motosherý uıymdastyrylyp, ol Tuńǵysh Prezıdent saıabaǵynan bastaý alyp, Qorqyt ata eskertkishine kelip toqtady. Dál osy kúni Qyzylorda demalys parki de óz jumysyn bastady. Park bıyl óz tartý-taralǵysymen kelip otyr. Onda kóptegen jańa atraktsıondar, demalys oryndary ashyldy. Bul orynda endi janýarlar baǵy da jumys jasap, onda jergilikti jerdegi kóptegen jan-janýarlar bolady dep kútilip otyr.
Esterińizge sala ketelik, budan buryn Qyzylordada Óner arbaty ashylatyny jóninde habarlaǵan bolatynbyz.
Ádiljan Úmbet
