Qyzylordada óndirilgen ónimder TMD naryǵynda joǵary baǵalanady
Qyzylorda oblysyndaǵy «Jan-Araı» JShS Syrdarııa jáne Qarmaqshy aýdandaryndaǵy birneshe sharýashylyqtardy biriktirip, bıyl 7000 gektarǵa kúrish ekti. Onyń ústine seriktestik óńirde táýligine 80 tonna jem shyǵaratyn zaýytty iske qosty. Munda 150 adam eńbek etedi.
«Jan-Araıdyń» agroındýstrıaldy kesheniniń qurylysyna oblys ortalyǵyndaǵy ońtústik óndiristik aımaqtan jer bólindi. «Bıznestiń jol kartasy - 2020» baǵdarlamasy aıasynda keshenge sý, gaz, káriz, elektr júıeleri ornatyldy. Zaýytta nemistiń quny 927 myń evro turatyn «PETKUS» fırmasynyń jabdyǵy ornatylǵan.
Seriktestik bul jobany «Baıqońyr» ÁKK AQ-men birlesip iske asyrdy. Jem shyǵarý, kúrish óńdeý jumystary halyqaralyq standartqa sáıkestendirilgen. Zaýyt aýmaǵynda shıkizatty, daıyn ónimdi saqtaıtyn qoımalar, avtotarazy, arnaıy zerthana, qaptaý tsehy men dıirmen ornalasqan. Shıkizatty seriktestik ózi egedi jáne jergilikti sharýa qojalyqtarynan satyp alady. Qaptalǵan kúrish Tájikstan, Túrkimenstan, Ózbekstanǵa eksporttalady. Jemge degen suranys ta joǵary. Qazir 30-dan astam fermerlik sharýashylyqtarmen jáne jeke kásipkerlermen aı saıyn jem jetkizip berý týraly kelisim-shart jasasqan.
Aldaǵy ýaqytta munda makaron tsehy jumysyn bastap, oǵan 75 adam jumysqa tartylmaq. Oǵan qosa ońtústikkoreıalyq tehnologııamen tez daıyndalatyn kúrish lapshasyn shyǵarý da josparlanǵan.
Seriktestik bazasyndaǵy «Jan-Araı-Agro» qaz fermasy Syrdarııa aýdanynyń Aıdarly aýylynda oryn tepken. Naqty kezeńde fermada 7700 bas qaz ósirilýde. Qazir qus fermasynyń 20 gektar jaıylymy men Sorqudyq kóli bar.
Aıta keteıik, naryq zańyna jaýap beretin seriktestikterdi qoldaý jaıy Elbasynyń Ult jospary - bes ınstıtýtsıonaldyq reformany júzege asyrý jónindegi 100 naqty qadam eńbeginde kórinis tapqany belgili. Ondaǵy 34-qadamda: Memleket-jekemenshik seriktestigin damytý sheńberinde penıtentsııarlyq ınfraqurylymdardy damytý jaıy aıtylyp, ondaı mekemelerdi mekemelerdi salýǵa, ustaýǵa jáne basqarýǵa jekemenshik sektordy tartý jóninde usynystardy eksheý jáne halyqaralyq tájirıbeni zertteý máselesi qoıylǵan bolatyn.
