Qyzylordada on tórt kúnniń ishinde 1 231 adam koronavırýs juqtyrdy
Ótken aptalardaǵy kórsetkish boıynsha oblysta koronavırýs ınfektsııasynyń epıdemıologııalyq ahýaly kúrt kúrdelenip otyr. Bıylǵy jyldyń 13 qańtarynan bastap oblys «qyzyl» aımaqta tur. Jyl basynan beri 1 231 adam koronavırýs juqtyrdy. Ol ótken aıdaǵy kórsetkishten birneshe esege joǵary.
Oblysta 14 qańtarda 320 adam koronavırýs indetine shaldyqty. Bul pandemııa bastalǵan kezden beri tirkelgen eń joǵary deńgeı - antırekord.
Epıdahýaldyń kúrt nasharlaýynyń negizgi sebebi - merekelik demalystar kezeńindegi halyqtyń qozǵalys belsendiliginiń artýy, qonaqqa barý, qonaq shaqyrýdyń jıileýi, ujymdyq is-sharalarda sanıtarııalyq-epıdemıologııalyq talaptardyń oryndalmaý. Sonymen qatar, óńirde «omıkron» shtamynyń bolý yqtımaldyǵy týraly boljam da bar.
«Búgingi kúni «omıkron» shtamy Nur-Sultan jáne Almaty qalalarynda zerthanalyq jolmen rastaldy. Bul úlken alańdaýshylyq týǵyzady. Sebebi, oblysaralyq, qalaaralyq mıgratsııa vırýstyń taralýyna úlken qaýip tóndiredi. «Omıkron» shtamynyń «deltaǵa» qaraǵanda juǵý jyldamdyǵy 5 esege joǵary. Adam aǵzasynda 70 ese tez kóbeıedi. Ólim-jitim kórsetkishi joǵary bolmaǵanymen, kópshilik jaǵdaıda vırýs týdyratyn aýyr zardaptarymen qaýipti. ıAǵnı «omıkronmen» aýyrǵan adamda tromboz, ınfarkt, ınsýltke shaldyǵý, múgedektik halge túsý táýekeli óte joǵary bolady», - dedi Qyzylorda oblysynyń Bas memlekettik sanıtarııalyq dárigeri Dınara Janabergenova halyqqa jarııalaǵan úndeýinde.
Osyǵan baılanysty «omıkron» shtamynyń taralýyna qarsy karantındik sharalar qaıta kúsheıtildi. Karantındik talaptar árbir azamattyń densaýlyǵyn qorǵaýǵa jáne óńirdegi sanıtarııalyq-epıdemıologııalyq salaýattylyqty jaqsartýǵa baǵyttalǵan.
«Barlyq boljam bizdiń ózimizge, qaýipsizdigimizdi qamtamasyz etý deńgeıine, árqaısymyzdyń áreketimizge tikeleı baılanysty. Vaktsınatsııa talaı epıdemııalardy jeńýdegi birden-bir qural ekeni belgili. Sondyqtan azamattyq jaýapkershilik tanytyp, ujymdyq ımmýnıtetke qol jetkizýdiń qamyn jasaýymyz kerek. KVI-men syrqattanýshylyqtyń ósýine qarsy is-qımyldyń birden-bir pármendi sharasy - vaktsınatsııalaý men revaktsınatsııalaý, áleýmettik baılanystardy shekteý. Úı-jaılardaǵy halyq tyǵyzdyǵyn azaıtý vırýstyń taralý qaýpin azaıtady. Sebebi aýrý juqtyrý kóbine tyǵyz baılanysta bolatyn jerlerde, jeldetýi nashar bólmelerde arta túsedi. Jahandyq syn-qaterlerdi eskere otyryp, sheteldik saparlardy keıinge qaldyrǵan durys», dedi D. Janabergenova.
Eske salsaq, budan buryn Qyzylorda oblysy bas memlekettik sanıtarııalyq dárigeriniń qaýlysy shyqty.
