Qyzylordada on kúnnen beri habarsyz ketken jasóspirim qyz Almatydan tabyldy
QYZYLORDA. QazAqparat - Qyzylordada on kúnnen beri habarsyz ketken 16 jastaǵy jasóspirim Almaty qalasy mańynan tabyldy, dep habarlaıdy QazAqparat tilshisi.
Bul jóninde Qyzylorda oblystyq bilim basqarmasy málim etti.
Esterińizge sala ketelik, 25 naýryzda Qyzylorda qalasyndaǵy otbasy úlgisindegi «Atameken» balalar aýylynyń úsh tárbıelenýshisi túngi ýaqyt 02.00 shamasynda shyǵyp ketip, sodan qaıta oralmaǵan.
Arada úsh kún ótkende olardyń ekeýi Almatydan tabyldy.
Úshinshi jasóspirim qyz Dildá Nuǵmanova sol kúıinshe habarsyz ketken edi. 2004 jyly dúnıege kelgen Dildániń Almaty qalasy mańynan júrgeni anyqtaldy.
«Ony aptaǵa jýyq ýaqyt boıy izdeý sharasy júrgizildi. Nátıjesinde ol Almaty qalasy mańynan tabyldy. Balalar úıiniń tárbıelenýshilerin izdeýge kóptegen azamattar atsalysty, Olardyń qatarynda polıtsııa departamentiniń mamandary, erikti azamattar bar. Jasóspirim qyzdardyń tabylýyna belsene aralasqan belsendiler - Maıa Jomart pen Anar Іzdenge, bastamashyl top ókilderine alǵysymyzdy jetkizemiz. Sondaı-aq, balalarǵa janashyrlyq tanytyp, tileýles bolǵan barsha azamattarǵa qurmetimiz sheksiz», - dep málim etti Qyzylorda oblystyq bilim basqarmasynan.
Vedomstvonyń málimetinshe, qazir tárbıelenýshiniń jaǵdaıy jaqsy, sala mamandarynyń qasynda. Al, budan buryn tabylǵan Rano men Lıýbov Almatydan Qyzylordaǵa jetkizilip, balalar aýylyna ornalastyryldy.
