Qyzylordada oqýshylarǵa aýyl ómiri nasıhattaldy
Bul shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda qolǵa alynyp otyr. Maqsaty - qalada turatyn oqýshylardyń aýyl ómirimen etene tanysýyna, eńbekke aralasýyna uıytqy bolý, oqýshy boıyndaǵy qarym-qatynas mádenıetin damyta otyryp, olardyń adamgershilik qasıetterin damytý jáne bos ýaqytyn tıimdi paıdalaný, osyndaı izgi isterge bastaý arqyly eńbekke atsalysýyna jol ashý bolyp tabylady.
Jas urpaqty izgilikke bastaıtyn shara Aral aýdanyndaǵy «Qambash» olımpıadalar jáne qosymsha bilim berý ortalyǵynda ashyldy. Ony Qyzylorda oblystyq bilim basqarmasy, «Daryn» oblystyq bilim berý ortalyǵy uıymdastyrdy.
«Alty kúndik saıahat «Bolashaqqa baǵdar: rýhanı jańǵyrý» baǵdarlamasynyń «Tárbıe jáne bilim» kishi baǵdarlamasy boıynsha júzege asady. Sol úsh baǵyttyń biri - «Sanaly azamat» balalyq jobasy damý perspektıvalaryn, eńbek naryǵy múmkindikterin, qabileti men talaptaryn eskere otyryp, oqýshylardyń beıimdiligin anyqtap, olarǵa qoldaý kórsetedi. Sondaı-aq, olardyń kásibı mamandyq ıesi atanýyna baǵyt-baǵdar beredi», - dedi «Daryn» oblystyq bilim berý ortalyǵy dırektorynyń orynbasary Gúljahan Іzbasarova.
Bul shara 24-29 tamyz kúnderi ótedi. Onyń barysynda oqýshylar aýyl ómiriniń tynys-tirshiligimen tanysady. Qyz balalar nan jabý, baýyrsaq pisirý sekildi istermen aınalyssa, er balalar baqsha jumystaryna aralasý arqyly sýarý, aram shópterden tazalaý sekildi jumystarǵa kóńil bóledi. Jas órender kıiz basý tehnologııasymen tanysyp, qamshy órý tásiline de zer salady. olar asyq atý, láńgi oınaý sekildi ulttyq oıyn túrlerinen saıysqa túsedi.
Atalmysh shara barasynda budan da basqa taǵylymdyq ister uıymdastyrylady. Osylaısha jas urpaqqa aýyl ómirin naıhattaýǵa jol ashylady.
Budan buryn Qyzylordada «Uly dala eli» tarıhı-tanymdyq ekspedıtsııasy ótkizildi.
