Qyzylordada oqýshylar zaǵıp jandarǵa arnalǵan qurylǵy oılap tapty
QYZYLORDA. QazAqparat - Qyzylorda oblysy Qazaly aýdanynda oqýshylar zaǵıp jandarǵa arnalǵan qurylǵyny oılap tapty, dep habarlaıdy QazAqparat tilshisi.
Atalmysh joba Reseıdiń Sankt-Peterbýrg qalasynda ótken halyqaralyq saıysta úzdik dep tanyldy. Oǵan qatysqan 74 komandanyń arasynan ekinshi orynǵa ıe boldy.
Kóziniń kórý qabiletinen aırylǵan múmkindigi shekteýli azamattar bul qurylǵy arqyly aldynda turǵan kóptegen kedergilerdi seze alady. Oǵan ýltra dybysty sıgnal berýshi ornatylǵan. Sondaı-aq, ony vıbratsııa arqyly seze alady.
Qazaly aýdanyndaǵy №249 mektep-lıtseıdiń oqýshysy Asylhan Qanıbaevtyń aıtýynsha, kórý múmkindigi shekteýli azamattardyń týysqandary arqyly atalmysh qurylǵynyń belgi berý júıesin smartfonǵa ornatýǵa bolady. Sol arqyly zaǵıp jandardyń qaıda júrgenin baqylap otyrýǵa bolady. Aldaǵy ýaqytta ónertapqysh oqýshylar kózildirik, belbeý, kúrteshe, aıaq kıim sekildi dúnıelerdiń jıyntyǵyn jasaýdy josparlap otyr.
Ónertapqysh oqýshylar jasaǵan qurylǵy ázirge 20-30 santımetr aýmaqtaǵy kedergini anyqtaýǵa múmkindigi bar. Aldaǵy ýaqytta ony 1 metrge deıin arttyrýǵa mán berilmekshi. Oqýshylar GPS qondyrǵysyn ornatýdy da kózdep otyr.
