Qyzylordada oqýshylar tórtinshi toqsanda dástúrli formatta oqıdy
QYZYLORDA. QazAqparat - Qyzylorda oblysynda tórtinshi toqsannan bastap óńirdegi jalpy bilim beretin mektepterdegi barlyq synyp oqýshylary aralas formatta oqıdy. Alaıda synyptaǵy bala sany 25 adamnan aspaýy tıis, dep habarlaıdy QazAqparat tilshisi.
Qazir óńir epıdahýal boıynsha jasyl aımaqta tur. Sondyqtan oblysta karantın talaby jeńildetilgen jańa qaýly shyqty. Onda kórsetilgenindeı, kontıngenti 300 oqýshyǵa deıin qalalyq jáne aýyldyq mektepterde synyptardaǵy balalar sanyn 25 adamnan asyrmaı dástúrli formatta oqytylady. Bilim berý uıymy ákimshiliginiń sheshimi boıynsha sabaqtan tys ýaqytta 15 adamnan aspaıtyn toptarda oqýshylardy jeke oqytýǵa ruqsat beriledi.
«Degenmen oblysta koronavırýs ınfektsııasynyń epıdemıologııalyq ahýaly áli de turaqsyz. Sondyqtan bilim uıymdarynda da saqtyq sharalary joǵary deńgeıde bolýy kerek. Sebebi ótken táýlikte 13 derek tirkeldi. Qazir óńirde bul dertti juqtyrǵandardyń sany 4007-ge jetti. Keıin opyq jemes úshin bul qaýipti vırýstyń taralýyn toqtatýǵa barymyzdy salýymyz qajet. Al ol úshin qarapaıym ǵana saqtyq sharalaryn oryndaý jetkilikti», - dedi oblystyń bas memlekettik sanıtarııalyq dárigeri Dınara Jańabergenova.
Aıta keteıik, oqý sanıtarııalyq-dezınfektsııalyq jáne maska rejımin saqtaı otyryp júredi. Jańa ózgeris búginnen bastap kúshine endi.
Esterińizge sala ketelik, budan buryn Qyzylordada sońǵy aptada karantın talabyn saqtamaǵan 8 toı toqtatyldy.
