Qyzylordada ókpeni jeldetý apparatyn 3 ese qymbatqa satyp alǵan basshylar tergelip jatyr

NUR-SULTAN. QazAqparat – Sybaılas jemqorlyqqa qarsy is-qımyl agenttigi Memleket basshysynyń dári-dármekti alypsatarlyq faktileriniń jolyn kesý jónindegi tapsyrmasy qalaı oryndalyp jatqanyn jarııa etti, dep habarlaıdy QazAqparat tilshisi.

«Elimizdiń barlyq óńirinde Sybaılas jemqorlyqqa qarsy qyzmet, «Adaldyq alańy» jobalyq keńseleri, arnaıy monıtorıng toby, sondaı-aq azamattyq belsendilerden qurylǵan jumys toptary 2500-den astam dárihanaǵa, 200 medıtsınalyq buıym qoımasyna, 250 aýrýhana men emhanaǵa monıtorıng júrgizdi. Jumys nátıjesinde 200-den astam zańbuzýshylyq anyqtaldy», - dedi QR Sybaılas jemqorlyqqa qarsy is-qımyl agenttiginiń parasat departamentiniń dırektory Ǵanıjan Asanuly onlaın baspasóz máslıhatynda.

Ol naqty mysaldardy keltirdi. Aıtýynsha elordalyq dárihanalarda «Amlodımed» jáne TsEF-3 preparatynyń baǵasy qymbat baǵada satylǵan. Al Qaraǵandy, Aqmola, Jambyl jáne Pavlodar oblystarynda dárilik zattar men medıtsınalyq buıymdardy azyq-túlik bazarlarynda jáne azyq-túlik dúkenderinde qaıta satý faktileri anyqtalǵan.

Sonymen qatar Nur-Sultan qalasynda, Túrkistan jáne Mańǵystaý oblystarynda óz qyzmetin lıtsenzııasyz júzege asyrǵan dárihanalar anyqtalsa, Qostanaı oblysynda oblystyq aýrýhananyń laýazymdy tulǵasyna qatysty ókpeni jasandy jeldetý apparattaryn 35%-ǵa joǵary baǵamen jetkizýge shart jasasý faktisi tirkelgen. Naqty baǵasy 520 myń teńge bolǵan jaǵdaıda satyp alý 702 myń teńgege josparlanǵan.

Sondaı-aq Qyzylorda oblysynda densaýlyq saqtaý basqarmasy basshysynyń 2 orynbasaryna qatysty 17,4 mln teńgeniń ókpeni jasandy jeldetý statsıonarlyq apparattaryn satyp alý faktisi boıynsha sotqa deıingi tergeý bastalǵan.

Apparattar «SK-Farmatsııa» usynǵan baǵadan 3 ese joǵary baǵaǵa satyp alynǵan.