Qyzylordada oblystyq eńbek sabaqtastyǵy forýmy ótti
QYZYLORDA. QazAqparat - Búgin Qyzylorda qalasynda «Ata kásip - altyn mura» atty V oblystyq eńbek sabaqtastyǵy forýmy ótti. Bul shara eńbek kúni merekesi aıasynda oraılastyryldy, dep habarlaıdy QazAqparat tilshisi.
Oǵan Qyzylorda qalasy men oblys aýdandarynan túrli salada jemisti eńbek etip kele jatqan ónegeli otbasylar keldi. Olardyń qatarynda temirjolshy, bilim, mádenıet, aýyl sharýashylyǵy jáne ózge de salalardyń ókilderi bar.
Saltanatty shara barysynda Qyzylorda oblysynyń ákimi Qyrymbek Kósherbaev bul forýmnyń 2013 jyldan bastap turaqty túrde ótkizilip kele jatqanyn atap ótti.
«Elbasynyń Jarlyǵymen bekitilgen «Eńbek kúni» merekesin bıyl besinshi ret atap ótip otyrmyz. Osy ýaqyt aralyǵynda kásipti atadan balaǵa mıras etip otyrǵan qanshama otbasylardy oblysta ǵana emes, respýblıka kóleminde tanyta bildik», - dedi aımaq basshysy.
Sonymen qatar, forým aıasynda «Eńbek joly» respýblıkalyq baıqaýynyń jeńimpazdary, kásipodaq uıymdarynyń úzdik jas mamandary jáne ártúrli saladaǵy jastardyń úzdik tálimgerleri belgili boldy. Bilim berý salasynan qazalylyq Seksenbaevtar, mal sharýashylyǵynan jalaǵashtyq Oınarovtar, mádenıetten syrdarııalyq Sádýaqasovtar, aýyl sharýashylyǵynan araldyq Berdimaǵanbetovter, egin sharýashylyǵynan jańaqorǵandyq Kóketovter áýleti úzdik atandy.
