Qyzylordada oblystyq eńbek forýmy ótti
QYZYLORDa. QazAqparat - Qyzylordada «Kásiptik bilim berý jáne bıznes: áriptester suhbaty» atty oblystyq eńbek forýmy ótti. Sharaǵa qatysýshylar óńirge qajetti mamandardy daıarlaý boıynsha usynystarymen bólisip, tájirıbe almasty, dep habarlaıdy QazAqparat tilshisi.
Bul shara Qyzylordada eńbek naryǵyna joǵary bilikti mamandar daıarlaýda aqparattyq tehnologııalardy qoldaný men damytýǵa arnalǵan.
«Sarapshylardyń baǵalaýy boıynsha Batys Eýropa memleketterinde jalpy ishki ónimdi qalyptastyrýda adamı kapıtaldyń úlesi - 30, AQSh-ta - 40, al, TMD elderinde bar bolǵany 10-15%-dy quraıdy. Sondyqtan ekonomıkalyq ósim men barlyq ıgilikterdiń negizgi draıveri adam, onyń bilimi men daǵdysy bolýy qajet. Adam jetekshi kúshke aınalýy kerek - onyń bilimi, sheberligi, tájirıbesi kóp jaǵdaıda tabysty istiń kepili bolyp tabylady. Nátıjesinde joǵary sapa men ekonomıkalyq ósý qamtamasyz etiledi»,-dedi oblys ákimi Qyrymbek Kósherbaev.
Bul rette, adamı kapıtal, eń aldymen, bilim berý salasy arqyly qalyptasatyn bolǵandyqtan, bul sala shyǵynǵa negizdelgen salalar sııaqty bolmaýy kerek. Kerisinshe, jańa ekonomıkalyq jaǵdaıda ekonomıkalyq ósimniń múmkindigin anyqtaıtyn ınvestıtsııalyq sala retinde qarastyrylýy qajet.
«Sondyqtan da, 2014 jyldan bastap aımaǵymyzdaǵy mektep bitirgen túlekterdi Máskeý men Sankt - Peterbýrgtiń eń myqty tehnıkalyq joǵary oqý oryndaryna jiberip jatyrmyz. Reseı Federatsııasy Úkimetiniń granty negizinde oqyp jatqan 452 bilim alýshylardyń Máskeýdiń bolat jáne qorytpa ınstıtýty men Sankt - Peterbýrgtiń memlekettik ósimdik polımeri tehnologııalyq ýnıversıtetin bıyl bitirgen alǵashqy 32 stýdenti oqýyn aıaqtap, elge oralsa, 42 túlek magıstratýrada bilimderin jalǵastyrýda. Reseı joǵary oqý oryndarymen áriptestik baılanys nátıjesinde bıylǵy oqý jyly taǵy da 58 bala oqýǵa tústi»,-dep atap ótti oblys ákimi.
Bilim berý salasynyń sapasyndaǵy taǵy bir mańyzdy kórsetkishi - bolashaq mamandardyń suranysqa ıe bolýy, olardyń tańdaǵan qyzmet salasynda jumys isteýge degen nıeti. Osy máselelerdi sheshý maqsatynda oblys ekonomıkasyna qajetti kadrlardyń uzaq merzimdik boljamyn anyqtaı otyryp, 2015 jyly aımaqtyq eńbek resýrstary balansy daıyndaldy. Bul, óz kezeginde aımaqqa qajetti mamandardy daıyndaýǵa memlekettik tapsyrysty anyqtaýǵa yqpal eteri anyq. Bitirýshilerdiń jumysqa ornalasýyna qıyndyq týdyrmaý úshin osy eńbek resýrsy balansy mekteptegi kásibı baǵdarly daıarlyqtyń negizi bolýy tıis.
Forýmǵa qatysýshylar oblysta beıindi oqytýdy uıymdastyrý boıynsha óz usynystarymen bólisti, daryndy jastardyń óndiriske engiziletin shyǵarmashylyq jobalarymen tanysty.
