Qyzylordada oblys ákimi Abaı eskertkishine gúl shoqtaryn qoıdy

QYZYLORDA. QazAqparat - Qyzylorda oblysynyń ákimi Gúlshara Ábdiqalyqova Abaı eskertkishine gúl shoqtaryn qoıyp, uly tulǵa rýhyna taǵzym etti, dep habarlaıdy QazAqparat tilshisi.

Atalǵan sharaǵa oblystyq Ardagerler keńesiniń tóraǵasy Serik Dúısenbaev, Qyzylorda qalasynyń ákimi Ǵanıbek Qazantaev qatysty.

Aıtýly merekege oraı aqynnyń esimin máńgi ulyqtaý maqsatynda oblystyń mádenıet uıymdarynda onlaın formatta túrli mádenı-tanymdyq sharalar ótkizilýde.

Atap aıtsaq, oblystaǵy mádenıet úıleri men klýbtarda «Abaı álemi» atty ardagerlerdiń oblystyq óner festıvali, «Kózimniń qarasy» atty Abaı shyǵarmashylyǵyna arnalǵan oblystyq óner baıqaýy, «Uly halyqtyń – uly Abaıy», «Abaı dana, Abaı dara», atty ádebı mýzykalyq kesh, «Abaı álemi» atty Abaı ánderinen kontsert, «Kemeńgerliktiń bıik shyńy Abaı» atty kórkemsóz oqýshylardyń aýdandyq baıqaýy uıymdastyryldy. Sondaı-aq, oblysta «Abaı – dana, Abaı – dara qazaqta!» atty poezııa saǵattary, oblys kitaphanalarynda «Uly dalanyń uly oıshyly», «Shyn Hákim, sózdiń asyl - baǵa jetpes», «Uly Abaı-ulttyq bolmysymyzdyń aınasy, «Abaı jaqqan shamshyraq» taqyryptarynda kitap kórmeleri, ádebı jyr keshteri ótkizilýde.

Á.Tájibaev atyndaǵy oblystyq ámbebap ǵylymı kitaphana qyzmetkerleri men barlyq oblys kitaphanashylary Abaı shyǵarmalaryn jas urpaqqa dáripteý maqsatynda 3 tamyzdan bastap «Abaıdy oqy, jalyqpa» taqyrybynda oqý chellendjin ótkizdi.

Abaı kúnine arnalǵan sharalar barlyq mádenıet uıymdary men basqarmanyń áleýmettik jelidegi paraqshalary men «Syr shańyraǵy» YouTube kanalyna jarııalanýda.

Atap ótý qajet, óńirdegi 4 bilim berý oshaǵyna, 86 kóshege Abaı esimi berilgen. Qyzylorda qalasyndaǵy Nazarbaev dańǵylynyń boıynda ornalasqan alleıaǵa Abaı esimi berilip, onyń qara sózderi tasqa qashalyp jazylǵan.

Eske salsaq, búgin elimizde Abaı kúni atalyp ótýde.