Qyzylordada «Nurly jer» boıynsha qurylys kompanııalaryn sýbsıdııalaý bastaldy

QYZYLORDA. QazAqparat - «Damý» qory «Nurly jer» baǵdarlamasy boıynsha úı salatyn qurylys kompanııalarynyń nesıelerin sýbsıdııalaýdy bastaıdy, - dep habarlady QazAqparat HAA tilshisi qorǵa silteme jasap.

Bıyl respýblıkalyq bıýdjette osy maqsatta 10,7 mlrd teńge qarastyrylǵan. 2018 jyly shamamen 300 myń sharshy metr turǵyn úı paıdalanýǵa beriledi dep josparlanyp otyr.

«Ekinshi deńgeıli bankter jeke kompanııalarǵa syıaqy mólsherlemesi boıynsha nesıe beredi. +5% sýbsıdııalaý týraly sheshim shyqqan sáttegi QR Ulttyq bankiniń belgilegen mólsherlemesi búgingi kúni jyldyq 16% qurap otyr. Onyń 7 paıyzyn «Damý» Kásipkerlikti damytý qory sýbsıdııalaıdy. Qurylys júrgizýshi jaq qalǵan 9%-yn tóleıdi. Sýbsıdııa turǵyn úı ǵımarattaryn salýmen aınalysyp júrgen kásipkerlerdiń jańadan alatyn nesıelerine beriledi. Burynnan turǵan ǵımarattardy kúrdeli jóndeýden ótkizip, jańartýmen aınalysatyn kompanııalar bul sanatqa kirmeıdi», - dedi «Damý» qorynyń sýbsıdııalaý departamentiniń dırektory Toǵjan Almantaeva.

Sýbsıdııa 36 aıǵa deıin, uzartý merziminsiz beriledi. Baǵdarlamanyń talaptary boıynsha - qurylys júrgizýshi kompanııa turǵyn úılerdiń kem degende 50 paıyzyn «Turǵyn úı qurylys jınaq banki» arqyly shekti baǵamen ótkizýi kerek.

Baǵa Astana men Almaty jáne osy qalalarynyń mańaıynda sharshy metrine 260 myń teńge bolsa, basqa óńirlerde 220 myń teńgege deıin.

Bul baǵa taza árleý jumystary júrgizilgen páterdiń 1 sh.m úshin kórsetilgen. Jeke úıdiń qurylysy barysynda 1 sharshy metrdiń quny 120 myń teńgeden aspaıdy. (ınjenerlik-kommýnıkatsııalyq ınfraqurylymdar qunyn eseptemegende).

Sonymen qatar, atalǵan baǵdarlama aıasynda halyqtyń «Qazaqstan ıpotekalyq kompanııasy» AQ arqyly ekinshi deńgeıli bankterden alǵan ıpotekalyq turǵyn úı nesıeleriniń syıaqy mólsherlemelerin sýbsıdııalaý da qarastyrylǵan.