Qyzylordada «Nur Otan» partııasynyń ókilderi baspana máselesi boıynsha turǵyndarmen kezdesti
QYZYLORDA. QazAqparat - «Nur Otan» partııasy Qyzylorda oblystyq fılıaly janyndaǵy partııalyq baqylaý komıssııasynyń músheleri «Qoljetimdi baspana-2020» baǵdarlamasy halyqqa qanshalyqty tıimdi?» degen taqyrypta «Araı-2», «Araı-3» móltek aýdandary turǵyndarymen júzdesti, dep habarlady QazAqparat HAA tilshisi partııaǵa silteme jasap.
Kezdesýge komıssııa múshelerimen qatar oblystyq partııa fılıaly qoǵamdyq qabyldaýynyń meńgerýshisi Maqsut Baekeev, oblystyq partııa fılıalyndaǵy zańger-keńesshi Sábıtbek Alshynbekov jáne Qyzylorda qalalyq turǵyn úı kommýnaldyq sharýshylyǵy men turǵyn-úı ınspektsııasy bóliminiń basshysy Qaırat Absultanov qatysty.
Qyzylorda qalalyq turǵyn úı kommýnaldyq sharýashylyǵy jáne turǵyn-úı ınspektsııasy bóliminiń basshysy Qaırat Absultanovtyń aıtýynsha, naqty kezeńde Qyzylorda qalasy boıynsha turǵyn úıge muqtaj 21593 otbasy kezekte tur. Ótken jyly «Óńirlerdi damytýdyń -2020» baǵdarlamasy boıynsha Qyzylorda qalasyna qarasty Tıtov móltek aýdanynan jas otbasylarǵa arnalǵan 180 páterli 3 turǵyn úı, «Qoljetimdi baspana-2020» baǵdarlamasy aıasynda 2015 jyly 240 páterli 5 ıpotekalyq úı «Turǵyn úı qurylys jınaq banki» arqyly, onan bólek kommýnaldyq turǵyn úı qorynan 120 páter, «Nurly jol» baǵdarlamasy boıynsha 350 páterlik 7 turǵyn úıdiń kilti turǵyndarǵa tabystalǵan.
«Turǵyn úı alý kezegine tirkelgen azamattardyń kezek retti qala ákimdiginiń resmı veb-saıtynda jańalanyp otyrady. Aldaǵy ýaqytta da azamattar sondaǵy rettilik boıynsha pátermen qamtylatyn bolady»,- deıdi bólim basshysy Qaırat Absultanov.
Kezdesý barysynda komıssııa múshelerimen suhbattasqan turǵyndar jalpy Elbasynyń halyqty baspanamen qamtý baǵytyndaǵy barlyq baǵdarlamalaryn tolyq qoldaıtyndyqtaryn jáne olardyń turǵyndar úshin tıimdi ekenin aıtty. Máselen, Abzal Jumabaıdyń birden páter alýǵa qarjysy bolmaǵan. Búginde ol «Turǵyn úı qurylys jınaq banki» arqyly baspanaly bolyp otyr.
«20 jylǵa aldym. Aılyq jalaqymnan tólep otyrmyn. Eń bastysy baspanam bar, qalǵany óz retimen bolyp jatar»,- deıdi ol.
Nurotandyqtar kezdesý sońynda olardyń usynys tilekterin tyńdap suraqtaryna tolyqqandy jaýap berdi.
