Qyzylordada neıroreabılıtatsııalyq ortalyq ashyldy
QYZYLORDA. QazAqparat- Qaladaǵy №3 emhananyń bazasynda ınsýltpen aýyrǵan naýqastarǵa neıroreabılıtatsııalyq ortalyq ashyldy, dep málim etti Óńirlik kommýnıkatsııalar qyzmetinde ótken baspasóz máslıhatynda oblystyq densaýlyq saqtaý basqarmasynyń basshysy Aqmaral Álnazarova.
Ol buǵan deıin Qazaly temirjol aýrýhanasynda 15 oryndyq neıroreabılıtatsııalyq bólimi bar ІІ deńgeıli ınsýlttyq ortalyq ashylǵanyn da aıtty, dep habarlaıdy QazAqparat tilshisi. Aıta ketken jón, jańa Ortalyq Aral, Qazaly, Qarmaqshy aýdandary men Baıqońyr qalasynyń turǵyndaryna da qyzmet kórsetedi.
«Aımaǵymyzdaǵy barlyq medıtsına uıymdarynda naýqastardy qoldaý qyzmetteri quryldy. Halyqqa qyzmet kórsetý sapasyn joǵarylatý men uzyn-sonar kezekti boldyrmaý maqsatynda BMSK uıymdaryndaǵy tirkeý bóliminiń jumysy ońtaılandyryldy. Osy jyldyń aqpan aıynda alǵash ret Emdeu.kz biryńǵaı aqparattyq platformasy qurylyp, Call-tsentr qyzmetiniń aıasy keńeıe tústi. Oǵan bıýdjetten 5 mln teńge qarjy bólindi. Bul júıe ınternet, telefondy qoldanyp qajetti dárigerge jazylýǵa nemese úıde otyryp-aq dárigerdi shaqyrýǵa múmkindik beredi», - deıdi basqarma basshysy.
