Qyzylordada Naýryz kóje molynan taratyldy

QYZYLORDA. QazAqparat. Syr óńirinde bıyl alǵash ret Kórisý kúni sharasy atap ótildi. Ulystyń Uly kúni qarsańynda ótken ıgilikti is jergilikti jurtshylyq tarapynan úlken qoldaý tapty, dep habarlaıdy QazAqparat tilshisi.  

Oblys ortalyǵynda oryn tepken «Syr súleıleri» alleıasy bul joly erekshe bezendirilgen. Atalmysh alańda alystan menmundalap turǵan ańshańqan kıiz úıler tigilgen. Osy aýmaqta ulttyq oıyndar ulyqtalyp, onda jastar ózara baq synasyp jatty. Án men jyrdan shashý shashylyp, myń buralǵan bıshiler óz ónerlerin kópshilikke tartý etti. Qalyń kópshilik bir-birimen qaýyshyp, júrekjardy izgi lebizderin bildirip jatty.

Saltanatty sharanyń ashylý rásiminde oblys ákiminiń orynbasary Rýslan Rústemov jurtshylyqqa quttyqtaý lebizin bildirdi.

 

«Ejelgi kezeńnen bizge mıras bolyp jetken qundylyqtardy búgingi urpaqqa jetkizý jóninde Elbasynyń «Bolashaqqa baǵdar: Rýhanı jańǵyrý» baǵdarlamalyq maqalasynda keńinen qamtylǵan.  Kún men tún teńesken Naýryz merekesi qarsańynda osyndaı ulaǵatty isti el arasynda keńinen nasıhattaýǵa mán berip otyrmyz. Keleshekte bul keń aýqymda jalǵasyn taba beredi», - dedi ákiminiń orynbasary.

 

Atalmysh shara barysynda jınalǵan halyq ańshańqan kıiz úıler ishine kirip, keńinen jaıylǵan dastarhan basynda ulttyq dámderden aýyz tıdi. Ulyq meıramnyń basty dámi - Naýryz kóje kelgen qonaqtarǵa molynan tartyldy.

 

Naýryz meıramyna oraılastyrylǵan sharalar tizbegi Qyzylordada osylaısha Kórisý kúni sharasynan bastaý aldy. Ulyq merekeni ulyqtaǵan mádenı sharalar jyldaǵydaı aı boıyna júrgiziledi. Keıingi kezeńde qyzylordalyq aǵaıyn ataýly meıramdy osylaısha keń aýqymda toılaýdy jolǵa qoıyp otyr.

    

Ádilet Qańtarbaev