Qyzylordada naýqastardy zańsyz emdep kelgen 3 emhananyń jumysy toqtatyldy
Bul jóninde Qyzylorda oblysynyń taýarlar men qyzmetterdiń sapasy men qaýipsizdigin baqylaý departamentiniń mamandary málim etti. Departament oblystyq jáne qalalyq medıtsınalyq uıymdar kórsetetin qyzmetterdiń sapasyn baqylaý jáne baǵalaý qyzmetin de atqarady.
2019 jyly medıtsınalyq kómek kórsetý máseleleri boıynsha departamentke 138 ótinish kelip túsken. Onyń 68-i qaralyp, 87 obektige tekserý júrgizildi. Jospardan tys tekserý nátıjesinde ótinishterdiń 51 paıyzynda sapasyz medıtsınalyq qyzmet kórsetý derekteri naqtylanǵan.
«Kelip túsken ótinishterdiń basym bóligi Qazaly jáne Jańaqorǵan aýdandyq aýrýhanalaryna qatysty bolyp otyr. Atap aıtqanda, patsıenttiń jaı-kúıin jete baǵalamaý, kesh dıagnostıkalaý, naýqasty aýrýhanaǵa kesh jatqyzý, dıagnostıka men emdeý hattamalarynyń saqtalmaýy, joǵary deńgeıdegi statsıonarǵa durys tasymaldamaý sııaqty kemshilikterdiń oryn alǵandyǵy anyqtaldy. 2019 jyly júrgizilgen tekserýlerdiń nátıjesinde departament ákimshilik quqyq buzýshylyq boıynsha 27 hattama toltyryp, aıyppul saldy. Medıtsına qyzmetkerleriniń is-áreketin quqyqtyq baǵalaý jáne protsessýaldyq sheshim qabyldaý úshin quqyq qorǵaý organdaryna 30 materıal jiberildi. Nátıjesinde lıtsenzııasyz jumys jasap kelgen 3 jeke medıtsınalyq uıym qyzmeti sot tártibimen toqtatyldy», - dep málim etti Qyzylorda oblysynyń taýarlar men qyzmetterdiń sapasy men qaýipsizdigin baqylaý departamentiniń baspasóz hatshysy Aıman Janahaeva.
Budan buryn Qyzylordada mektep ashanalaryn tekserýde birqatar kemshilik anyqtalǵan edi.