Qyzylordada «N. Nazarbaev: dáýir, tulǵa, qoǵam» kóshpeli kórmesi ashyldy
Búgin Qyzylorda oblystyq tarıhı-ólketaný murajaıynda «N. Nazarbaev: dáýir, tulǵa, qoǵam» atty kórme saltanatty túrde ashyldy. Sharaǵa Qyzylorda oblysynyń ákimi Qyrymbek Kósherbaev, Qazaqstan Respýblıkasynyń Tuńǵysh Prezıdenti - Elbasy kitaphanasynyń dırektory Ámirhan Rahymjanov qatysty.
Jurtshylyq aldynda Qyzylorda oblysynyń ákimi Qyrymbek Kósherbaev kóshpeli kórme jobasynyń jergilikti turǵyndar úshin mańyzy zor ekenin atap ótti. Aldaǵy ýaqytta Syr óńiri halqy Tuńǵysh Prezıdent - Elbasynyń ómir joly, eli úshin atqarǵan eńbegimen jaqyn tanysa alady.
«Arǵy-bergi tarıhyna qysqasha kóz júgirtsek, Syr óńiri - kóne kezeńnen beri saqtardyń ordasy, bertin kele oǵyz-qypshaq birlestikteriniń ortalyǵy, Altyn Orda men Aq Orda handarynyń týyn tikken qasıetti topyraq. 1925 jyly Qazaq Respýblıkasynyń alǵashqy astanasy bolyp, ultymyzdyń tarıhı qazaq ataýy qaıtaryldy. Sondyqtan Tuńǵysh Prezıdent - Elbasy Nursultan Ábishuly Nazarbaev bizdiń óńirdi «Syr - Alashtyń anasy» dep ataǵany barshamyzǵa belgili. Tuńǵysh sóziniń máni tereń. Djordj Vashıngton, Kemal Atatúrik, Mahatma Gandı sekildi tuǵyrly tulǵalardyń qatarynda Tuńǵysh Prezıdentimiz Nursultan Ábishuly Nazarbaevtyń esimi juldyzdaı jarqyrap turýy bizge maqtanysh sezimin uıalatady», - dedi oblys ákimi.
Ótken ǵasyrdyń toqsanynshy jyldarynyń basynda táýelsizdigin endi ǵana alǵan elimiz júzden asa ulttyń basyn qosyp, sonshalyqty salt-dástúr, mádenıet pen til shoǵyrlanǵan qoǵamda jańasha ómir súrý saltyn bastady. Úsh ǵasyrǵa jýyq alyp ımperııanyń qursaýynda bolyp, barlyq bolmys-bitimin rýhanı qundylyǵyn, ulttyq sezimin joǵalta bastaǵan eldiń aldynda qıyn kezeń turdy.
«Sol bir qıyn-qystaý kezeńde tyǵyryqtan shyǵar jol taýyp, asyl murattarǵa jeteleıtin tulǵaǵa tarıhı suranys paıda boldy. Qazaqstan halqy alǵashqy Prezıdent saılaýynda tarıhı tańdaýyn jasady. Eli tańdaǵan Elbasy qazaqstandyq damýdyń dańǵyl jolyn jasady. Halqymyzdyń talaı ǵasyr ańsaǵan táýelsizdik, egemendik, erkindik, azattyq degen qasıetti sózderi Elbasynyń kemeńger kóshbasshylyǵymen aqıqatqa aınaldy. Tuńǵysh Prezıdent - Elbasy kitaphanasynyń kóshpeli kórmesiniń Syr jurtshylyǵy úshin qyzmet jasaýy - mańyzy zor oqıǵa», - dedi oblys ákimi.
Elbasy kitaphanasynyń «N.Nazarbaev: dáýir, tulǵa, qoǵam» atty kóshpeli kórme jobasy 2017 jyly qarasha aıynda Almaty qalasynan bastaý alǵan edi. Búgingi kúnge deıin kórme Túrkistan, Atyraý, Aqtóbe oblystarynda, Almaty, Shymkent qalalarynda ótti. Atalmysh óńirlerde kórmeni tamashalaýǵa 730 myńnan astam adam qatysty.
«Syr óńiri - qazaq halqy úshin mańyzy zor aımaqtyń biri. Qasıetti Qorqyt babamyzdyń izi bar, bir ǵasyrdaı buryn elimizdiń astanasy bolǵan Qyzylordada Elbasy kitaphanasynyń «N. Nazarbaev: dáýir, tulǵa, qoǵam» kóshpeli kórme jobasynyń ashylý saltanatyna jınalyp otyrǵanymyzǵa qýanyshtymyz. Atalmysh kórme táýelsizdigimizdiń talbesigi atanǵan Almatyda bastalyp, byltyr jyl boıy elimizdiń birqatar óńirlerinde tabysty ótken bolatyn. Kóshpeli kórmeniń Qyzylorda oblysyna kelýin qazaq handyǵynyń bas shahary - Syǵanaq pen ótken ǵasyrdyń ekinshi onjyldyǵynda elimizdiń astanasy bolǵan Qyzylordaǵa táýelsiz Qazaqstannyń elordasy - Nur-Sultan qalasynyń tartýy dep baǵalaýǵa tolyq negiz bar. Syr jurtshylyǵynyń Elbasynyń ómir joly men saıası qyzmetin baıandaıtyn jádigerlerden umytylmas áser alatynyna kámil senemiz», - dedi Qazaqstan Respýblıkasynyń Tuńǵysh Prezıdenti - Elbasy kitaphanasynyń dırektory Ámirhan Rahymjanov.
Kóshpeli kórme jobasy aıasynda Syr óńirinde aýqymdy ǵylymı-bilim berý jáne mádenı-aǵartýshylyq is-sharalar ótkiziledi. Sondaı-aq, kóshpeli ekskýrsııa, halyqaralyq ǵylymı konferentsııa, aımaqtyq kásibı sessııa, semınar-trenıngter, taqyryptyq ekskýrsııalar, Qyzylorda oblysy boıynsha kóshpeli kórmeler men ekskýrsııa bolady dep josparlanyp otyr.
Oblystyń Shıeli jáne Qarmaqshy aýdandarynda 5-6 sáýir kúnderi «Tuńǵysh» ekskýrsııalyq tujyrymdamasy aıasynda kóshpeli ekskýrsııalar men kórmeler ótkizildi. Qazaqstan Respýblıkasy Tuńǵysh Prezıdenti - Elbasy kitaphanasyndaǵy Ámirhan Rahymjanov Qorqyt ata atyndaǵy Qyzylorda memlekettik ýnıversıtetiniń professorlyq-oqytýshylyq quramymen jáne jastar belsendilerimen kezdesti. Á.Tájibaev atyndaǵy oblystyq ámbebap kitaphanasynda kóshpeli kórmege oraı mańyzdy sharalar ótkizildi.
