Qyzylordada «N.Nazarbaev: Bolashaq búginnen bastalady» konferentsııasy ótti

QYZYLORDA. QazAqparat - Qorqyt Ata atyndaǵy QMÝ stýdentter saraıynda «N.Nazarbaev: Bolashaq búginnen bastalady» halyqaralyq ǵylymı-praktıkalyq konferentsııa ótkizildi, dep habarlaıdy QazAqparat tilshisi.

Bul shara QR Tuńǵysh Prezıdentiniń kitaphanasy uıymdastyrǵan «N.Nazarbaev: dáýir, tulǵa, qoǵam» jyljymaly kórme jobasy aıasynda uıymdastyryldy.

Konferentsııaǵa Túrkııa, Germanııa, Kanada, Ońtústik Afrıka, Kenııa, Ýganda, Fılıppın jáne elimizdiń barlyq óńirlerinen meımandar keldi.

Halyqaralyq ǵylymı-praktıkalyq konferentsııanyń ashylýyna oblys ákimi Qyrymbek Kósherbaev, Qazaqstan Respýblıkasynyń Tuńǵysh Prezıdenti - Elbasy kitaphanasynyń dırektory Ámirhan Rahymjanov, otandyq jáne sheteldik joǵary oqý oryndarynyń stýdentteri, magıstranttary, doktoranttary men ǵalymdary qatysty.

«Ult Kóshbasshysy Nursultan Ábishuly Nazarbaevtyń «Táýelsizdik jyldaryndaǵy jetistikti bir ǵana Qyzylorda oblysynan kórýge bolady» degen sózi kıeli Syrdyń kelbetin aıqyndap tur. Búginde aımaǵymyz kóptegen salalar boıynsha respýblıkada kóshbasshylar qatarynda keledi. Ásirese, ınvestıtsııa tartýda, óńdeý ónerkásibin damytýda, qurylys salýda, áleýmettik damýda biz kóptegen jetistikterge qol jetkizdik», - dedi oblys ákimi Q.Kósherbaev.

Qazaqstan Respýblıkasynyń Tuńǵysh Prezıdenti - Elbasy kitaphanasy 2015 jyldan bastap oqytý semınar-trenıngter jobasyn qolǵa aldy. Ol joba jastarǵa arnalǵan «Bolashaqqa jol árqaısymyzdan bastalady» taqyrybyna arnalǵan.

«Halyqaralyq-praktıkalyq konferentsııa taqyryby «Jastar saıasaty: bolashaq búginnen bastalady» ataldy. Osy oraıda Elbasymyz belgilep bergen jastardy qoldaý boıynsha basymdyqtardy júzege asyrý joldaryn talqylaımyz. Urpaqtan urpaqqa jalǵasatyn sabaqtastyqty qamtamasyz etýge nazar aýdaramyz», - dedi Á.Rahymjanov.

Konferentsııa plenarlyq otyryspen bastalyp, sektsııalyq otyrystarǵa jalǵasty.

Esterińizge sala keteıik, keshe oblystyq tarıhı-ólketaný mýzeıinde «N.Nazarbaev: dáýir, tulǵa, qoǵam» kórmesiniń saltanatty ashylý rásimi ótti.

Al Qyzylorda qalasyndaǵy Á.Tájibaev atyndaǵy ǵylymı ámbebap kitaphanasynda «Elbasy kitaphanasynyń aqparattyq resýrstary» atty aımaqtyq kásibı sessııa ótti. Sondaı-aq, N.Bekejanov atyndaǵy drama teatrynda kontsert uıymdastyryldy.