Qyzylordada mýzeıde jastarmen kezdesý ótkizildi

QYZYLORDA. QazAqparat - Qyzylorda qalasyndaǵy «Aqmeshit» mýzeıinde «Rýhanı jańǵyrý – jastarǵa jarqyn jol» atty jastarmen kezdesý uıymdastyryldy, dep habarlaıdy QazAqparat tilshisi.

Atalmysh shara Tuńǵysh Prezıdent - Elbasy Nursultan Nazarabevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyryldy. Jastarmen kezdesý óskeleń urpaqtyń rýhanı adamgershiligin, mádenı tárbıesin, patrıottyq sezimin arttyrý maqsatynda qolǵa alynyp otyr. Kezdesýge joǵary jáne orta arnaýly oqý oryndarynyń oqytýshylary men stýdentter qatysty. Olarǵa mýzeı zaldaryna tarıhı-tanymdyq ekskýrsııa júrgizildi.

«Aqmeshit» mýzeıi 2005 jyly Qyzylordanyń respýblıka astanasy bolǵanyna 80 jyl tolýyna oraıy uıymdastyryldy. Mýzeıge HH ǵasyrdyń basynda salynǵan ǵımarat berildi. Bul arhıtektýralyq eskertkishtiń ádemiligi ótken ǵasyrdaǵy ólkemizdegi sáýlet óneriniń damý deńgeıin kórsetedi. Ǵımaratqa kúrdeli jóndeý júrgizildi. Mýzeı ekspozıtsııasy jasaldy. Oǵan Orynbor, Qyzylorda, Almaty, Nur-Sultan qalalary jaıly eksponattar qoıylǵan.

Ekspozıtsııalyq zaldarda Aqmeshit-Perovsk qalalarynyń tarıhy, «Qyzylorda - Qaz SSR-nyń astanasy», Qazaq Ortalyq Atqarý komıteti tóraǵasynyń jumys kabıneti, HH ǵasyrdyń basyndaǵy zııaly adamdardyń turmysy jaıly kórsetilgen.

Sondaı-aq, Qyzylordada Kúıikkesken qalashyǵyn zertteýge kóńil bólindi.