Qyzylordada Mustafa Shoqaıdyń eskertkishi jaqynda tuǵyryna qonady
QYZYLORDA. QazAqparat - Músinshi Kósher Baıǵazıev jasaǵan Mustafa Shoqaı eskertkishi laıyqty oryn tabylsa, tuǵyryna qonýǵa daıyn. Bul týraly Óńirlik kommýnıkatsııalar ortalyǵynyń brıfınginde oblystyq mádenıet, arhıvter jáne qujattama basqarmasy basshysynyń mindetin atqarýshy Mıra Ábýova aıtyp berdi,-dep habarlady QazAqparat HAA tilshisi.
- Osyǵan deıin tańdalǵan orny eki ret aýysty. Qoıatyn jer anyqtalyp, abattandyrý jumystary júrgizilse, eskertkishti qazir aparyp ornatýǵa barmyz, - dedi ol.
Brıfıngte salada atqarylǵan jumystar aıtyldy. Byltyr Jańaqorǵan aýdanyndaǵy Talap aýyldyq okrýgine qarasty Besaryq eldi mekeninde aýyldyq klýb ashyldy. «Jol kartasy-2020» baǵdarlamasy aıasynda 8 klýb pen 1 kitaphana jóndeldi. Oblystyq tarıhı-ólketaný mýzeıi qaıta jańǵyrtylyp, Shıeliniń Y.Jaqaev atyndaǵy kúrish ósirý tarıhy mýzeıine arnap jańa ǵımarat salyndy. Ejelgi qalashyqtarda arheologııalyq qazba jumystary júrgizilip, 9 jádigerimiz ıÝNESKO-nyń Dúnıejúzilik muralarynyń aldyn ala tiziminen oryn tapty. Oblystyq fılarmonııa basqa qalalarda, alys-jaqyn shet elderde kontsertter berse, kórermen nazaryna N.Bekejanov atyndaǵy qazaq mýzykalyq drama teatry 223 spektakl usyndy.
- Osy jyly «EKSPO-2017» kórmesi aıasynda Astanada oblystyń óner kúnderin, «Qorqyt jáne Uly Dala sazy» folklorlyq-mýzykalyq óner festıvalin, sýretshiler sımpozıýmyn uıymdastyrý josparlanyp otyr, - dedi basqarma ókili.
Jalaǵash aýdanynyń Mádenıet, Shıeli aýdanynyń Eńbekshi aýyldarynda klýb salynsa, Qazaly aýdanynyń Jalańtós batyr aýylyndaǵy klýb pen Qyzylordadaǵy arhıvter ǵımaraty paıdalanýǵa beriledi.
