Qyzylordada múmkindigi shekteýli jastarǵa respýblıkalyq lagerge joldama berildi

QYZYLORDA. QazAqparat - Qyzylorda oblysynda az qamtylǵan, múmkindigi shekteýli jáne belsendi 10 jasqa respýblıkalyq «Jastar Otanǵa» lagerine joldama berildi. Bul joldama oblys ákimi Qýanyshbek Ysqaqovtyń jastarmen júzdesý barysynda tabys etildi, dep habarlaıdy QazAqparat tilshisi.

Júzdesý Aral aýdanyndaǵy «Qambash» olımpıadalar jáne qosymsha bilim berý ortalyǵynyń alańynda ótkizildi. Kezdesýge óńirdiń jastar uıymdarynyń belsendileri, az qamtylǵan jáne kópbalaly otbasylardan shyqqan jastar, oblystyq uıymdardyń basshylary, jumyssyz jáne múmkindigi shekteýli jastar, barlyǵy 120-ǵa jýyq adam qatysty.

Aımaq basshysy jastar taqyrybynda oı bólisip, olardyń usynys-tilekterin tyńdady. Óz kezeginde Aral jáne Qazaly aýdandarynyń ákimderi jáne oblys uıymdary men mekemeleriniń basshylary jastardy qoldaý boıynsha atqarǵan jumystary men jastarǵa arnalǵan múmkindikter týraly baıandady. 2014 jyldan bastap Reseı Federatsııasynyń Úkimetimen kelisim negizinde qyzylordalyq túlekter Máskeý men Sankt-Peterbýrgtiń úzdik tehnıkalyq joǵary oqý oryndarynda bilim alyp keledi. Olar oqýdy aıaqtaǵannan keıin jergilikti kásiporyndar men memlekettik organdar olardy jumysqa ornalastyrý máselesin sheshedi.

Júzdesý sońynda oblys ákimi Qýanyshbek Ysqaqov belsendi, az qamtylǵan otbasydan shyqqan, múmkindigi shekteýli jastar men jumyssyzdarǵa «Jastar Otanǵa» respýblıkalyq jastar lagerine joldama tabystady.