Qyzylordada muqtaj otbasylardy baspanamen qamtý máselesi talqylandy

QYZYLORDA. QazAqparat - Qazaqstan kommýnıstik partııasy Qyzylorda oblystyq fılıalynda turǵyn úı men jas otbasylardy baspanamen qamtý máselesine baılanysty qoǵamdyq talqylaý ótti, dep habarlaıdy QazAqparat tilshisi.

Qazir elimizde turǵyndardy turǵyn úımen qamtamasyz etý - ózekti taqyryptyń biri. Partııanyń oblystyq fılıaly osy maqsatta jergilikti basshylyqqa óz jobasyn usynyp otyr.

«Aıta ketý kerek, elimizde turǵyn úıge muqtaj otbasylar az emes. Memleket tarapynan halyqtyń áleýmettik jaǵynan tómen toptaryna qoldaý jasalyp keledi. Qazaqstanda jyl saıyn qanshama kóp qabatty turǵyn úı boı kóteredi. Dese de áli de halyqty baspanamen qamtý máselesi óz deńgeıinde sheshimin taba qoıǵan joq. Sondyqtan oblystyq fılıal jergilikti basshylyqqa osy oraıda óz usynysyn jetkizgen bolatyn. Negizinde muqtaj otbasylarǵa arendalyq negizde páterdi tek jańadan salynǵan úılerden berýge nazar aýdarylady», - deıdi Qazaqstan kommýnıstik partııasy Qyzylorda oblystyq fılıalynyń tóraǵasy Talǵat Teleýbaev.

Onyń aıtýynsha, qazir arendaǵa beriletin páterlerdiń baǵasy keı otbasylarǵa arzanǵa túspeıdi. Bastapqy jarna tóleý máselesi de ońaı emes.

«Sol sebepti biz ondaı páterlerdi buryn paıdalanylǵan kópqabatty úılerden de berý máselesin kóterdik. Bul baspana baǵasynyń arzandaýyna áserin tıgizedi. Sondaı-aq, bizdiń usynysymyz qoldaý tapqan jaǵdaıda oǵan qol jetkizetin otbasylar sany artar edi», - deıdi fılıal tóraǵasy.