Qyzylordada Muhamedǵalı Sýjıkovke eskertkish-bıýst ornatyldy
QYZYLORDA. QazAqparat-Qyzylordada Syr óńiriniń damýyna ólsheýsiz úles qosqan kórnekti memleket jáne qoǵam qaıratkeri Muhamedǵalı Álenuly Sýjıkovtiń eskertkish-bıýsti ashyldy, dep habarlaıdy QazAqparat HAA tilshisi.
Oblystyq ardagerler keńesiniń músheleri, qoǵam belsendileri, ustazdar qaýymy jáne M. Sýjıkovtiń urpaqtary qatysqan shara barysynda óńir ákimi Qyrymbek Kósherbaev aıtýly tulǵanyń ómirbaıany men eńbek jolyna keńinen toqtalyp ótti.
«Ulylardyń ulaǵatyn umytpaý - el bolamyz degen halyqtyń tarıh aldyndaǵy paryzy» degen Elbasy Nursultan Ábishuly Nazarbaevtyń ulaǵatty sózin eske ala otyryp, búgingi shara ıesi - Muhamedǵalı Álenuly Sýjıkovke arnalǵan jaqsy sóz halqynyń bergen baǵasy dep bilemiz. «Esimi el júreginde saqtalǵan er ǵana baqytty» deıdi. Sanaly ǵumyryn halyqtyń ál-aýqatyn jaqsartýǵa arnap, Syr óńiriniń órkendeýine, damýyna qaıtalanbas qoltańbasyn qaldyrǵan Muhamedǵalı Álenuly Sýjıkovtiń nar tulǵasy zaman ótken saıyn bıikteı bermek»,-dedi Q. Kósherbaev.
Muhamedǵalı Álenuly Sýjıkov 1910 jyly 15 qyrkúıekte qazirgi Astrahan oblysy Volodar (Marfa) aýdanynda dúnıege kelgen.
Eńbek jolyn muǵalimdikten bastap, qazaq jumysshylar fakýltetiniń dırektory qyzmetine deıin kóteriledi. Qoǵamdyq-saıası jumystarǵa belsene aralasyp, 28 jastaǵy ustaz aýdandyq partııa konferentsııasynda aýdandyq komıtettiń jáne onyń bıýrosynyń múshesi bolyp saılanady. Stalıngrad oblysy Volodar aýdandyq atqarý komıtetiniń tóraǵasy bolyp taǵaıyndalady.
1948 jyly Qazaqstanǵa joldama alyp, Aqtóbe oblystyq partııa komıtetiniń kadr jónindegi hatshysy bolyp saılandy.
Kóp uzamaı oblystyq partııa komıtetiniń birinshi hatshylyǵyna bekip, 1951 jyldyń sońyna qaraı Qazaqstan Kompartııasy Ortalyq Komıtetiniń hatshysy qyzmetine saılandy. 1954 jyly Ortalyq Komıtettiń ıdeologııa jónindegi hatshysy qyzmetin atqara júrip, Qyzylorda oblystyq partııa komıtetiniń plenýmynda obkomnyń birinshi hatshylyǵyna saılandy.
